हेटौंडाः मकवानपुरको राक्सिराङ गाउँपालिका–३ गोठारीमा शुक्रबार एक बालिका मृत अवस्थामा फेला परेकी छन् । सोही ठाउँका भुवन सिंह घलानको ३ वर्षीया छोरी भूमिका घलान खोलाले बगाई मृत अवस्थामा फेला परेको बागमती प्रदेश प्रहरी कार्यालय, हेटौंडाले जनाएको छ ।
घट्टमा गएकी आमालाई पछ्याउँदै जाँदा बालिकालाई चुर्लिङ खोलाले बगाएको प्रहरीले उल्लेख गरेको छ । बालिका मृत अवस्थामा देखेपछि स्थानीयले प्रहरीलाई खबर गरेको थियो । शुक्रबार बिहान १० बजेर ३० मिनेटको समयमा प्रहरी घटनास्थलमा पुगेर घटनास्थल सुरक्षित राखिएको थियो । त्यसपछि १ बजेर २५ मिनेटमा मुचुल्का कार्य समाप्त पश्चात शवलाई पोष्टमार्टमका लागि हेटौडा अस्पताल ल्याइएको थियो । घटनाबारे थप अनुसन्धान भइरहेको प्रहरीले जनाएको छ ।
