हेटौंडाः हेटौंडा उपमहानगरपालिकाका वडा नम्बर ४ का वडा अध्यक्ष नवीन सिग्देलमाथि कार्यकक्षमै कुटपिट भएको छ । एमाले मकवानपुरका सचिवसमेत रहनुभएका सिग्देललाई नेकपा एमाले मकवानपुर जिल्ला कमिटीका सदस्य सानु लामा दोङले कुटपिट गरेका हुन् । आफूमाथि कुटपिट भएको भन्दै वडा अध्यक्ष सिग्देलले प्रहरीमा उजुरी दिनुभएको मकवानपुरका प्रहरी प्रमुख प्रहरी उपरीक्षक वामदेव गौतमले बताउनुभएको छ ।
वडा अध्यक्ष सिग्देललाई कुटपिट गर्ने लामा जिल्ला खेलकुद विकास समिति मकवानपुरका निवर्तमान अध्यक्षसमेत हुन् । प्रहरी उपरीक्षक गौतमका अनुसार सिग्देलले मंगलबार जिल्ला प्रहरी कार्यालय मकवानपुरमा लामाविरुद्ध उजुरी दिनुभएको छ । अभियुक्त लामा फरार रहेको र खोजी कार्य भइरहेको प्रहरी उपरीक्षक गौतमले जानकारी दिनुभयो ।
