हेटौंडाः मकवानपुर प्रहरीले चोरीको दुई वटा मोटरसाइकलसहित दुई जनालाई पक्राउ गरेको छ । पक्राउ पर्नेमा हेटौंडा–१५ का २० वर्षीय मनोज पुलामी मगर र हेटौंडा–५ शान्तिनगरका २२ वर्षीय सुरज ठकुरी रहेको जिल्ला प्रहरी कार्यालय मकवानपुरले जनाएको छ ।
शुक्रबार राति ११ बजेर ३० मिनेटको समयमा हेटौंडा–५ स्थित शान्तिनगरबाट ना ३९ प २२९९ नम्बरकोे मोटरसाईकल चोरी भएको भन्ने सूचना प्राप्त हुनसाथ जिल्ला प्रहरी कार्यालय मकवानपुरबाट खटिएको प्रहरी टोलीले खोजतलास गर्ने क्रममा आइतबार हेटौंडा–१५ बस्ने मनोज पुलामी मगरको घर भित्रबाट उक्त चोरी भएको मोटरसाइकल र थप बा ३३ प ६११४ नम्बरको मोटरसाइकल समेत फेला पारेको थियो ।
प्रहरीले पुलामीलाई उक्त मोटरसाइकलहरुको बारेमा सोधपुछ गर्दा पुलामीले आफु र साथी हेटौंडा–५ शान्तीनगर बस्ने सुरज ठकुरी मिली दुबै मोटरसाइकल चोरी गरी ल्याएको बताएको थियो । प्रहरीले ठकुरीलाई हेटौंडा–१० स्थित हेटौडा बसपार्कबाट फेला पारी पक्राउ गरेको थियो । उक्त चोरीको दुबै मोटरसाइकलसहित पक्राउ परेका पुलामी र ठकुरीलाई नियन्त्रणमा लिई थप अनुसन्धान गरिरहेको प्रहरीले जनाएको छ ।
