हेटौंडाः मकवानपुर प्रहरीले लागुऔषध खैरो हिरोईनसहित एकजनालाई पक्राउ गरेको छ । पक्राउ पर्नेमा हेटौंडा–३ बस्ने राजेन्द्र कामी रहेको प्रहरीले जनाएको छ ।
बुधबार साँझ साढे ६ बजेको समयमा जिल्ला प्रहरी कार्यालय मकवानपुरबाट खटिएको प्रहरी टोलीले हेटौंडा–१० न्यूरेनीबाट राजेन्द्रलाई पक्राउ गरेको हो । राजेन्द्र सडकमा शंकास्पद रुपमा हिडिरहेको अवस्थामा प्रहरीले सुरक्षा जाँच गर्ने क्रममा उसले लगाएको पाईन्टको खल्तीमा सेतो प्लाष्टिकमा सानो पुरिया बनाई सिखर चुरोटको बट्टा भित्र लुकाई छिपाई राखेको अवस्थामा लागुऔषध खैरो हिरोईन ३ ग्राम ५ सय मिली ग्राम फेला परेको हो । राजेन्द्रलाई लागुऔषधसहित नियन्त्रणमा लिई थप अनुसन्धान कार्य भईरहेको जिल्ला प्रहरी कार्यालय मकवानपुरले जनाएको छ ।
