हेटौंडाः मकवानपुरको मनहरी–६ स्थित पूर्व–पश्चिम राजमार्ग अन्तर्गत आज शुक्रबार बस दुर्घटना हुँदा दुई जनाको घटनास्थलमै मृत्यु भएको छ । मृत्यु हुनेमा बा.ख. ४४५४ नम्बरका बस सहचालक नुवाकोट जिल्लाको तारकेश्वर गाउँपालिका–४ का २२ वर्षीय सुवास श्रेष्ठ र सोही ठाउँका २९ वर्षिय शम्भु दर्लामी मगर रहेको इलाका प्रहरी कार्यालय मनहरीका प्रहरी निरीक्षक प्रकाश थापाले जानकारी दिनुभयो ।
आज शुक्रबार बिहान ८ बजेर ३० मिनेटको समयमा हेटौंडाबाट चितवनतर्फ जाँदै गरेको यात्रुबाहक बस आफै अनियन्त्रित भई दुुुर्घटना भएको हो । यसैगरी अन्य ९ जना व्यक्ति घाइते भएको र उनीहरुलाई उपचारका लागि चितवनमा पठाइएको प्रहरी निरीक्षक थापाले बताउनुभयो । बसमा अन्दाजी १६ जना यात्रुहरु सवार रहेको उहाँले बताउनुभयो । घटनाबारे थप अनुसन्धान भइरहेको प्रहरीले जनाएको छ ।
