हेटौंडाः आन्तरिक पर्यटन पुनःउत्थान तथा प्रवद्र्धनमा जाउँ है पोखरा अभियान अन्तर्गत होटल संघ पोखराले मंगलबार हेटौंडामा छलफल तथा अन्तरक्रिया गरेको छ । होटल संघ पोखराका अध्यक्ष लक्ष्मण सुवेदीको अध्यक्षता तथा होटल संघ मकवानपुरका अध्यक्ष शंकरलाल श्रेष्ठको प्रमुख आतिथ्यमा अन्तरक्रिया भएकोे हो ।
कार्यक्रममा बोल्नुहुँदै अध्यक्ष सुवेदीले जाउँ है पोखरा अभियान पश्चात पोखराले आन्तरिक पर्यटनमा ३ प्रतिशतबाट ४० प्रतिशत आन्तरिक पर्यटक संख्या बढेको बताउनुभयो । उहाँले आन्तरिक पर्यटन पनि दिगो पर्यटन हो भनेर अभियान सुरु गरेको बताउनुभयो । कोरोनाका कारण पर्यटन क्षेत्रमा परेको असरपछि होटल व्यवसायीहरु पनि मारमा परेको उहाँले स्मरण गर्नुुभयो । अहिले होटल क्षेत्र पुरानै लयमा फर्किन लागेको उहाँको भनाई छ ।
होटल संघ पोखराले दुई दशक अगाडि सुरु गरेको जाउँ है पोखरा अभियानमा होटल क्षेत्रमा नाकाबन्दी, भूकम्प र कोरोनाका कारण परेको प्रभावलाई पुनः पुरानै लयमा ल्याउने उद्देश्यले देशका विभिन्न शहरहरुमा अभियान चलाइरहेको बताइएको छ । हेटौंडा पनि आन्तरिक पर्यटकीय स्थल भएको बताउनुहुँदै होटल संघ मकवानपुरका अध्यक्ष शंकरलाल श्रेष्ठले जाउँ है पोखरा अभियान जस्तै हेटौंडा पनि हुनुपर्नेमा जोड दिनुभयो ।
