हेटौंडाः बागमती प्रदेशका मुख्यमन्त्री राजेन्द्रप्रसाद पाण्डेले हेटौंडा–५ स्थित निर्माणाधिन क्याम्पा रंगशालाको निरीक्षण गर्नु भएको छ । बिहीबार मुख्यमन्त्री पाण्डेले रंगशालाको निरीक्षण गर्नु भएको हो ।
क्याम्पा रंगशाला निर्माणको अगुवाई गरिरहेको पिप्ले युवा क्लबका अध्यक्ष सुशील घिमिरेका अनुसार रंगशालाको निरीक्षण गर्नुहुँदै मुख्यमन्त्री पाण्डेले रंगशाला निर्माण कार्यको प्रसंशा गर्नुभयो । रंगशाला निर्माणमा प्रदेश सरकारले सहयोग गर्ने प्रतिवद्धता पनि मुख्यमन्त्री पाण्डेले व्यक्त गर्नुभएको घिमिरेको भनाइ छ । रंगशालामा अहिले प्याराफिटको प्लास्टर गर्ने काम चलिरहेको क्लबका अध्यक्ष घिमिरेले बताउनुभयो ।
अबको एक महिनाभित्र रंगशाला निर्माण सम्पन्न गरी प्रतियोगिता सञ्चालन गर्न योग्य बनाउने उहाँले जानकारी दिनुभयो । रंगशाला निर्माणका लागि अहिलेसम्म डेढ करोड रुपैयाँ खर्च भइसकेको छ । जसमध्ये १ करोड १५ लाख रुपैयाँ हेटौंडा उपमहानगरपालिकाले र बाँकी अन्य सहयोगी दाताहरुले उपलब्ध गराएको अध्यक्ष घिमिरेले बताउनुभयो ।
