हेटौंडाः मकवानपुरको अग्रणी साहित्यिक संस्था साहित्य संगम मकवानपुरले यस वर्ष ८ जना साहित्यकारलाई विभिन्न सम्मान र पुरस्कार प्रदान गर्ने भएको छ । संगमको मंगलबार बसेको बैठकले सम्मानसम्बन्धी निर्णय गरेको हो ।
संगमकी अध्यक्ष अनिता न्यौपानेको अध्यक्षतामा बसेको बैठकले संस्थाले प्रत्येक वर्ष प्रदान गर्दै आएको सम्मान तथा पुरस्कार साहित्यका विभिन्न विधामा योगदान पुर्याएका साहित्यकारलाई प्रदान गर्ने निर्णय गरेको छ । संगमले भैरव अर्याल स्मृति सम्मान यस वर्ष हरिकला उप्रेतीलाई प्रदान गर्ने निर्णय गरेको छ । भैरव अर्यालको परिवारले २ लाख ५० हजार रुपैयाँको अक्षयकोष स्थापना गरेको सम्मानको राशी २१ हजार १ सय ११ रुपैयाँ रहेको छ । यस्तै, साहित्य संगम मकवानपुरले स्थापना गरेको मकवानपुर साहित्य श्रीबाट साहित्यकार सुवास खनाललाई प्रदान गर्ने निर्णय गरिएको छ । जसको राशी १५ हजार ५ सय ५५ रुपैयाँ रहेको छ ।
संगमले यसवर्षको भेषनाथ अधिकारी स्मृति पुरस्कार साहित्यकार मनोज भण्डारीलाई प्रदान गरिने भएको छ । साहित्यकार विशाल अधिकारी (आशुतोष) ले बुबाको नाममा स्थापना गर्नुभएको यो पुरस्कारको राशी १५ हजार ५ सय ५५ रुपैयाँ रहेको छ । हाल अमेरिका निवासी दीपक मुडभरीले मातापिताको नाममा स्थापना गर्नुभएको शुभद्रादेवी–मदन मुडभरी स्मृति काव्य पुरस्कार साहित्यकार दीपक गौतमलाई प्रदान गर्ने निर्णय गरिएको छ । जसको राशी १० हजार रहेको छ ।
यस्तै, शिक्षासेवी देवप्रसाद श्रेष्ठले आमाको नाममा स्थापना गर्नुभएको मंगलादेवी श्रेष्ठ स्मृति नारी पुरस्कार साहित्यकार रुकु कार्कीलाई प्रदान गरिने निर्णय भएको छ । जसको राशी ७ हजार ७ सय ७७ रुपैयाँ रहेको छ । यसैगरी हाँस्यव्यंग्यकार आरसी रिजालले आमाको नाममा स्थापना गर्नुभएको णकुमारी स्मृति साहित्य पुरस्कार बालजागृति इङ्लिस बोर्डिङ स्कुलकी सुविज्ञा सुवेदीलाई प्रदान गरिने भएको छ । जसको राशी ५ हजार रुपैयाँ रहेको छ । यो पुरस्कार साहित्यमा कलम चलाउने माध्यमिक तहमा अध्ययनरत छात्रालाई प्रदान गरिँदै आएको छ ।
यसैगरी, शेषजङ्ग स्मृति कथा पुरस्कार हेटौंडा स्कुल अफ म्यानेजमेन्टमा अध्ययनरत् उषाकिरण अधिकारीलाई प्रदान गरिने भएको छ । शिक्षासेवी डेण्डीजङ्ग शाहले छोराको स्मृतिमा स्थापना गर्नुभएको यो पुरस्कारको राशी ५ हजार रुपैयाँ रहेको छ । यो पुरस्कार माध्यमिक तहमा अध्ययनरत् विद्यार्थी बीच कथा प्रतियोगिता गराई एक जनालाई प्रदान गरिँदै आएको छ । यस्तै साहित्यसेवी मुक्तिगोविन्द वैद्यले यसवर्षबाट स्थापना गर्नुभएको मुक्ति–तारा साहित्य पुरस्कार समीक्षक घनश्याम घिमिरेलाई प्रदान गरिने भएको छ । जसको राशी १० हजार रुपैयाँ रहेको छ । यो पुरस्कार साहित्यका विभिन्न विधामा योगदान पुर्याएका तथा क्रियाशील साहित्यकारलाई प्रदान गरिने जनाइएको छ ।
सार्वजनिक गरिएका सम्मान तथा पुरस्कार कोभिड–१९ संक्रमण न्यूनीकरण भएपछि विशेष साहित्यिक कार्यक्रमको आयोजना गरी प्रदान गरिने संगमकी अध्यक्ष न्यौपानेले जानकारी दिनुभएको छ ।
