हेटौंडाः बागमती प्रदेशको प्रदेश सभाको चौथो वार्षिकोत्सव मंगलबार मनाइएको छ । बागमती प्रदेश सभाका सभामुख सानुकुमार श्रेष्ठको अध्यक्षता तथा बागमती प्रदेश प्रमुख यादव चन्द्र शर्माको प्रमुख आतिथ्यमा कार्यक्रम भएको हो ।
कार्यक्रमबाट प्रदेश सभा दर्पण (पाँचौ अंक) २०७८ र प्रदेश सभाको चिनारी पुस्तकको विमोचन गरिएको छ । पुस्तकको विमोचन प्रदेश प्रमुख शर्माले गर्नुभएको हो । प्रदेश सभाको गतिविधिबारे प्रदेश सभाका सचिव कृष्णहरि खड्काले प्रस्तुतीकरण गर्नुभएको थियो ।
यस्तै प्रदेश सभाको २०७७ माघ १९ गतेदेखि २०७८ माघ १७ गतेसम्म अवधिमा भएका प्रदेश सभाको बैठकमा सहभागी हुनु भएका सदस्यहरुलाई प्रदेश प्रमुख शर्माले सम्मानपत्र वितरण गर्नुभएको छ । यस्तै प्रदेश सभाको पहिलो सचिव रोजनाथ पाण्डे सम्मानित हुनु भएको छ । प्रदेश सभाको उत्कृष्ट कर्मचारीलाई प्रशंसापत्र प्रदेश प्रमुख शर्माले वितरण गर्नुभयो ।
कार्यक्रमा बागमती प्रदेशका मुख्यमन्त्री राजेन्द्रप्रसाद पाण्डे, प्रदेश सभाका उपसभामुख राधिका तामाङ, बागमती प्रदेश सरकारका पुर्व मुख्यमन्त्री अष्टलक्ष्मी शाक्य लगायतको आतिथ्य रहेको थियो ।
