हेटौंडाः रोटरी क्लब अफ मकवानपुरमा सुन्दर कुमार जोशी पदस्थापित हुनुभएको छ । अन्तर्राष्ट्रिय स्वयंसेवी संस्था रोटरी इन्टरनेशनलमा आवद्ध रोटरी क्लब अफ मकवानपुरको वर्ष २०२१/२२ का लागि जोशीले पदाधिकारी समेत चयन गर्नुहुँदै शुक्रबार साँझ हेटौंडाको एभोकाडो होटेलमा पदस्थापन कार्यक्रमको आयोजना गरेको हो ।
सातौं पदस्थापन कार्यक्रम रोटरी क्लब अफ मकवानपुरको बर्ष २०२०/२१ का अध्यक्ष कविन सांगामीको अध्यक्षता तथा हेटौंडा उपमहानगरपालिकाका मेयर हरिबहादुर महतको प्रमुख आतिथ्यमा भएको थियो । अध्यक्ष पदमा पदस्थापित हुनुभएपछि सुन्दर कुमार जोशीले उपाध्यक्षमा शुक्र जोशी, सचिवमा विष्णु खनाल, कोषाध्यक्षमा मनोज ढोडरी, सहसचिवमा हरि कुमार शर्मा र सहकोषाध्यक्षमा दीपक उप्रेतीलाई नियुक्त गर्नुभयो ।
कार्यक्रममा हेटौंडा उपमहानगरपालिकाका मेयर हरिबहादुर महतले रोटरी क्लब अन्तर्राष्ट्रियरुपमै प्रतिष्ठित संस्था भएको उल्लेख गर्नुभयो । उहाँले रोटरी क्लब अफ मकवानपुरको अग्रसरतामा स्थापना गरिने भनिएको प्लास्टिक सर्जरी अस्पतालका लागि जग्गा उपलव्ध गराउने प्रतिवद्धता व्यक्त गर्नुभएको छ । पदस्थापनपछि अध्यक्ष सुन्दर कुमार जोशीले संस्थापक, अग्रजको सहयोगमा राम्रो काम गर्ने प्रतिवद्धता व्यक्त गर्नुभयो ।
आफ्नो कार्यकाललाई सफल बनाउन सहयोग गरेको भन्दै कविन सांगामीले उत्कृष्ट सदस्यको रुपमा सचिव कृष्ण बहादुर कार्कीलाई सम्मान गर्नुभयो । यस्तै कोभिड–१९ संक्रमणको समयमा निशुल्क खाना खुवाउने कार्यक्रमका संयोजक शुक्र जोशी नेतृत्वको टोलीलाई पनि अध्यक्ष सांगामीले सम्मान गर्नुभयो । पदस्थापन कार्यक्रम विष्णुगोपाल महर्जनको संयोजनमा भएको हो ।
संस्थापक अध्यक्ष ज्ञानकृष्ण प्रजापति, पूर्व अध्यक्षहरु विजयलाल श्रेष्ठ र रामेश्वर श्रेष्ठ, रोटरी क्लब अफ हेटौंडाका अध्यक्ष रामप्रसाद शर्मा, पूर्व अध्यक्ष उज्ज्वल शर्मा भण्डारी, महालक्ष्मी विकास बैंक कमाने शाखाका प्रबन्धक रोशन सेनको पनि उपस्थिति रहेको थियो ।
