हेटौंडाः त्रिभुवन राजपथको कुन्छालमा पेट्रोलियम पदार्थ बोकेको ट्यांकर दुर्घटना भएको छ । अमलेखगञ्जबाट मकवानपुरको सिस्नेरीका लागि पेट्रोलियम पदार्थ बोकेको ट्यांकर आइतबार बिहान दुर्घटना भएको हो ।
त्रिभुवन राजपथ हुँदै कुन्छाल–कुलेखानीको बाटोबाट सिस्नेरी जाँदै गरेको ना ७ ख ५२१८ नम्बरको ट्यांकर कुन्छाल पुलबाट खोल्सामा खसेर दुर्घटना भएको इलाका प्रहरी कार्यालय पालुङले जानकारी दिएको छ । केही साताअघिको भारी वर्षाले पुलको छेउमा क्षति पुर्याएर सडक कटान गरेको ठाउँमा ट्यांकर दुर्घटना भएको स्थानीयबासीले जानकारी दिएका छन् ।
सिस्नेरीस्थित बस्ताकोटी आयल स्टोर्सका लागि ९ हजार लिटर डिजेल र ३ हजार लिटर पेट्रोल बोकेको ट्यांकर दुर्घटना भएको हो । दुर्घटनामा चालक र सहचालक सामान्य घाइते भएका छन् । दुर्घटनाको जानकारी पाउनासाथ दमकल र प्रहरी घटनास्थलमा पुगेको थियो ।
