हेटौंडाः नेपाल बुद्धिचाल संघका निवर्तमान अध्यक्ष राजेशहरि जोशीको निधन भएको छ । ६६ वर्षको उमेरमा जोशीको आइतबार राती हृदयघातबाट मृत्यु भएको बताइएको छ ।
हेटौंडा–२ का स्थायीवासी जोशीको आइतबार राती सवा ८ बजेको समयमा ललितपुर जिल्लाको ललितपुर महानगरपालिका, पाटनको सुनधारास्थित निवासमै निधन भएको नेपाल बुद्धिचाल संघका सचिव धरमबहादुर लामाले जानकारी दिनुभएको छ ।
२०५६ सालमा मकवानपुर जिल्ला बुद्धिचाल संघका संस्थापक अध्यक्ष हुनुभएका जोशी २०५९ सालमा नेपाल बुद्धिचाल संघको उपाध्यक्ष हुनुभएको थियो । २०६४ सालमा नेपाल बुद्धिचाल संघका अध्यक्ष हुनुभएका जोशी दुई कार्यकाल (२०७२ चैत १३ गतेसम्म) अध्यक्ष हुनुभयो । सन् २०१० देखि सन् २०१४ सम्म भारतबाहेक दक्षिण एसियाली देशका बुद्धिचाल संघ अर्थात जोन ३.२ को अध्यक्ष हुनुभएका जोशी सन् २०१४ मा नर्वेमा भएको अन्तर्राष्ट्रिय बुद्धिचाल संघ (फिडे) अन्तर्गतको अनुशासन विभागको सदस्य हुनुभएको थियो । फिडेको अनुशासन विभागमा जोशीको दोस्रो कार्यकाल सन् २०२२ सम्म रहेको थियो ।
जोशी हेटौंडा–४, स्कूलरोडस्थित मकवानपुर बचत तथा ऋण सहकारी संस्थाको अध्यक्ष समेत हुनुहुन्थ्यो । २०५७ सालदेखि सहकारीको अध्यक्ष हुनुभएका जोशी अहिले पनि सहकारीको अध्यक्ष हुनुहुन्थ्यो । जोशीका श्रीमति, एक छोरा र एक छोरी छन् ।
