हेटौंडाः चोरी भएको मोटरसाइकलसहित हेटौंडाका एक युवक पक्राउ परेका छन् । हेटौंडा उपमहानगरपालिका वडा नम्बर ११ बस्ने ३३ वर्षीय विजय लामालाई प्रहरीले सोमबार पक्राउ गरेको हो ।
आइतबार ओखलढुंगा घर भई हाल हेटौंडा–४ बस्ने प्रेमबहादुर तामाङको जिल्ला प्रहरी कार्यालय मकवानपुरअगाडि सडक छेउमा पार्किङ गरी राखेको मोटरसाइकल चोरी भएको थियो । उनले ना ३३ प ६२५८ नम्बरको पल्सर मोटरसाइकल हराएको भनी जिल्ला प्रहरी कार्यालय मकवानपुरमा निवेदन दिएका थिए ।
प्रहरीले खोजतलास गर्ने क्रममा सोमबार हेटौंडा–१० को राप्तीपुल नजिकैबाट चोरीको मोटरसाइकलसहित लामालाई पक्राउ गरेको जिल्ला प्रहरी कार्यालय मकवानपुरका प्रहरी नायब उपरीक्षक जयश्वर रिमालले जानकारी दिनुभयो ।
