हेटौंडाः पूर्वपश्चिम राजमार्गअन्तर्गत हेटौंडा–१०, वन विज्ञान क्याम्पस अगाडि बुधबार बिहान ट्रकले किच्दा एकजना साइकल यात्रीको हातै चुँडिएको छ । हेटौंडा बजारबाट बारा जिल्लातर्फ जाँदै गरेको को १ क १५४३ नम्बरको ट्रकले सोही दिशातर्फ साइकलमा जाँदै गरेको हेटौंडा–९, कर्राका ३६ वर्षीय दिल गौतमलाई ठक्कर दिएको थियो ।
ट्रकले ठक्कर दिएर लडेका गौतमलाई ट्रकको चक्काले किच्दा दायाँ हात नै चुँडिएको जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक ईन्द्रबहादुर रानाले जानकारी दिनुभएको छ । दुर्घटनामा परी घाइते भएका गौतमलाई हेटौंडा अस्पतालमा उपचार गरेर थप उपचारका लागि काठमाडौं पठाइएको छ ।
गौतमलाई बुधबार दिउँसो साढे १२ बजे नै हेलिकप्टरमार्फत काठमाडौं लगिएको छ । प्रहरीले ट्रक र ट्रक चालक सुनसरी जिल्लाको गढी गाउ“पालिका–२ का दिलिप कुमार चौधरीलाई नियन्त्रणमा लिएको छ ।
