हेटौंडाः छैठौं भेट्रान्स कप फुटबल प्रतियोगितामा आयोजक हेटौंडा भेट्रान्सले विजयी सुरुवात गरेको छ । सोमबार भएको उद्घाटन खेलमा हेटौंडा भेट्रान्सले कोहल्वी भेट्रान्सलाई ६–१ को फराकिलो गोलअन्तरले पराजित गरेको छ ।
उद्घाटन खेल अघि हेटौंडा उपमहानगरपालिकाका मेयर हरिबहादुर महतको प्रमुख आतिथ्यमा उद्घाटन कार्यक्रम भएको थियो । हेटौंडा भेट्रान्स क्लबका उपाध्यक्ष नवराज बज्राचार्यको अध्यक्षतामा भएको कार्यक्रममा हेटौंडा उपमहानगरपालिका ४ नम्बर वडा अध्यक्ष नवीन सिग्देल, बागमती प्रदेश खेलकुद विकास समितिका सदस्य माधव तिमल्सिना, मकवानपुर जिल्ला खेलकुद विकास समितिका अध्यक्ष सानु लामा, हेटौंडा उपमहानगर खेलकुद विकास समितिका अध्यक्ष चन्द्र शाहीको पनि उपस्थिति रहेको थियो ।
माघ १० गतेसम्म चल्ने प्रतियोगिता नकआउटका आधारमा खेलाइने संयोजक कविन सङ्गामीले जानकारी दिनुभएको छ ।
प्रतियोगितामा २० वटा टिमको सहभागिता रहेको छ । प्रतियोगिताको विजेताले नगद एक लाख एक हजार रुपैयाँ उपविजेता हुने टिमले नगद ५५ हजार रुपैयाँसहित सिल्ड, मेडल र प्रमाण पत्र प्राप्त गर्नेछन् ।
