हेटौंडाः भरुवा बन्दुक र लागूऔषध गाँजासहित हेटौंडा–६ का ४७ वर्षीय ईमान सिंह तामाङलाई बारा प्रहरीले पक्राउ गरेको छ । शनिबार राती ९ बजेर ४५ मिनेटको समयमा ईलाका प्रहरी कार्यालय निजगढबाट प्रहरी निरीक्षक विकास थपलियाको कमाण्डमा अस्थायी प्रहरी पोष्ट रतनपुर बारा समेतबाट खटिएको संयुक्त प्रहरी टोलीले ईमान सिंह तामाङलाई पक्राउ गरेको जनाएको छ ।
प्रहरी टोली गस्ती गर्दै जाने क्रममा निजगढ नगरपालिका–१३ स्थित भक्तलाल खोलाको बगरमा अवैध लागूऔषध गाँजा ओसारपसार, खरिद–बिक्री गरी रहेका ८/१० जना प्रहरी टोलीलाई नै गोली चलाएको बारा प्रहरीको भनाइ छ । तस्करको समूहबाट गोली चलाएपछि प्रहरी टोलीले प्रतिकार स्वरुप ५ राउण्ड गोली फायर गरी तस्करहरू मध्येका हेटौंडाका ईमान सिंह तामाङलाई नियन्त्रणमा लिएको बारा प्रहरीले जनाएको छ ।
घटनास्थलबाट ५ वटा सेतो बोरामा एक सय दुई केजी अवैध लागूऔषध गाँजा र ईमान सिंहको साथबाट लोड भएको एक थान भरुवा बन्दुक बरामद भएको प्रहरीले जानकारी दिएको छ । प्रहरीले ईमान सिंहलाई हिरासतमा राखेर हातहतियार खरखजाना र लागूऔषध नियन्त्रण ऐन, २०३३ बमोजिम कारवाहीका लागि थप अनुसन्धान गरिरहेको जनाएको छ ।
