हेटौंडाः मकवानपुरको मकवानपुरगढी गाउँपालिका–६, डुम्रेकुनास्थित जालपादेवी माविमा ४ कोठे शैक्षिक भवनको सिलान्यास गरिएको छ । मकवानपुरगढी गाउँपालिका वडा नम्बर ६ का अध्यक्ष टिकाप्रसाद दहालले सोमबार एक कार्यक्रमका बीच शैक्षिक भवनको सिलान्यास गर्नुभएको हो । २०७८ साल जेठ मसान्तसम्ममा निर्माण सम्पन्न गर्ने गरी ६८ लाख ५१ हजार रुपैयाँ लागतमा भवन निर्माण गर्न लागिएको हो ।
राष्ट्रिय पुनर्निर्माण प्राधिकरणमातहतको जिल्ला आयोजना कार्यान्वयन इकाई (शिक्षा) मार्फत प्राप्त बजेटबाट भवन निर्माण गर्न लागिएको विद्यालयका प्रधानाध्यापक मनकाजी घलानले जानकारी दिनुभएको छ । शैक्षिक भवन सिलान्यास कार्यक्रममा वडा सदस्य चिनिमाया लुङ्बा, विद्यालय व्यवस्थापन समितिका अध्यक्ष नरबहादुर स्याङ्तान, सदस्य केशवप्रसाद सापकोटा, शारदा चौलागाई, शिक्षक अभिभावक संघका अध्यक्ष कल्पना ढुङ्गाना, शिक्षक प्रतिनिधि भवनाथ गौतम, जिल्ला आयोजना कार्यान्वयन इकाई (शिक्षा) का प्राविधिक सुशान्त दहाल, शिक्षक भुवन तिमल्सिना, शान्तिमाया स्याङ्बोका साथै स्थानीय अभिभावको पनि उपस्थिति रहेको प्रधानाध्यापक मनकाजी घलानले जानकारी दिनुभएको छ ।
