हेटौंडाः संविधान दिवसको अवसरमा मकवानपुरको भीमफेदी गाउँपालिकास्थित भीमफेदी कारागारका १७ जना कैदीलाई कैद माफी दिन कारागार कार्यालयले सिफारिस गरेको छ । कारागार कार्यालयले गरेको सिफारिसका आधारमा संघीय सरकारले कैदीको कैद माफीका लागि राष्ट्रपतिलाई सिफारिस गरेको छ ।
सरकारले आज २ सय ८९ कैदीको सजाय माफीका लागि राष्ट्रपति समक्ष सिफारिस गरेको छ । संविधान दिवसको अवसरमा ५० प्रतिशत सजाय भुक्तान गरिसकेका, असल चालचलन भएका र नकारात्मक अपराधको सूचीमा नपरेकालाई सिफारिस गरिएको भीमफेदी कारागारका प्रमुख मदन लामाले जानकारी दिनुभएको छ । भोलि असोज ३ गते शनिबार संविधान दिवस मनाइँदै छ । हरेक वर्ष संविधान दिवस, प्रजातन्त्र दिवस, गणतन्त्र दिवस अवसर पारेर मन्त्रिपरिषद्को सिफारिसमा राष्ट्रपतिबाट कैदीलाई बाँकी कैद माफी गर्ने गरिएको छ ।
