हेटौँडाः अघिल्ला वर्षहरुमा भन्दा शैक्षिक गुणस्तरमा सुधार आएको हेटौँडा–१ स्थित अमर माविकी प्रधानाध्यापक मालती उप्रेतीको दावी छ । अघिल्ला वर्षहरुमा भन्दा अनुत्तीर्ण हुने दरमा कमी मात्रै आएको होइन, पठनपाठनप्रति अभिभावक तथा विद्यार्थीहरुको धारणामा पनि परिवर्तन आउँदै गएको देख्दा प्रधानाध्यापक उप्रेतीलाई विद्यालयमा केही प्रगति भएकै हो भन्ने लाग्छ । विद्यालय व्यवस्थापन समिति र शिक्षक तथा कर्मचारीको समन्वय राम्रो भएकोले यो फरकपना आएको उप्रेतीको भनाइ छ ।
हुन त अघिल्लो वर्ष विद्यालयमा ६ सय ५० जना विद्यार्थीहरु अध्ययन गर्दथे तर यस वर्ष विद्यालयमा विद्यार्थी संख्या घटेको छ । यस वर्ष छ सय ८२ जना विद्यार्थीमात्र यस विद्यालयमा पढे । तर विद्यालयको गुणस्तर घटेको कारण नभएर स्थानीय क्षेत्रमा अर्को आधारभूत विद्यालय यस वर्षबाट माध्यमिक तहमा परिणत भएको कारण विद्यार्थी घटेको उहाँको दावी छ । यसअघि धेरै विद्यार्थी आउने वडा नं ११ सिमलटारको शंकरज्योति आधारभूत विद्यालयमा यस वर्ष एसईई पहिलो ब्याचले परीक्षा दिएका छन् । विगतमा यो विद्यालय क्षेत्र वरिपरिका विद्यार्थीहरु माध्यमिक तहमा पढ्न अमर मावि नै जाने गर्दथे ।
अघिल्लो शैक्षिक सत्रमा विद्यालयले धेरै कार्यक्रम थप ग¥यो । विद्यालय व्यवस्थापन समितिले अघिल्लो वर्ष शिक्षण सिकाइ सुधार योजना ल्याउने निर्णय ग¥यो । यस कार्यक्रमपछि विद्यालयले अभिभावकहरुलाई सक्रिय बनाउन प्राथमिकता दियो । वर्षमा कम्तीमा तीन पटक अभिभावक बैठकमा उपस्थित हुनैपर्ने, सबैभन्दा धेरै पटक विद्यालयमा सक्रियता देखाउने अभिभावकहरुलाई सम्मानको व्यवस्थासमेत गरिएको उप्रेतीले बताउनुभयो । अभिाभावकको सक्रियतापछि बालबालिकाको वास्तविक समस्याबारे शिक्षक र अभिभावकबिच अन्तरक्रिया गरिने गरेको उहाँले बताउनुभयो ।
पूर्वप्राथमिक कक्षाहरु इसीडी, केजी तथा कक्षा ३ सम्म कक्षामा दुई जना शिक्षकहरु राखेर पठनपाठन गर्न थालियो । यसले गर्दा सबै कक्षाका विद्यार्थीलाई बराबर ध्यान दिन सहज भएको बुझाई छ । नयाँ शैक्षिक सत्र सुरु हुनै लाग्दा विद्यालयले यसवर्ष पनि परिमार्जितरुपमा शिक्षण सिकाइ सुधार योजनामा कार्यक्रम थप गर्दै लैजान विद्यालय व्यवस्थापन समितिको बैठकले निर्णय गर्ने विद्यालयको योजना छ ।
विद्यालयले बैशाख ७ गतेबाट पुस्तक वितरण तथा भर्ना र १० गतेबाट कक्षा सुरु गर्ने तयारी गरेको छ । यसअघि निस्क्रिय रहेका अभिभावकहरु पनि नियमित बैठकमा आउन थालेको उप्रतीको भनाइ छ । यस्तै, विद्यार्थीहरु उत्तीर्ण हुने दर बढेर प्रत्येक विषयमा ८० प्रतिशत विद्यार्थीहरु उत्तीर्ण भएका प्रधानाध्यापक उप्रेतीको दावी छ ।
हाल माध्यमिक तहका लागि संघीय अनुदानमा ३ जना शिक्षकहरु रहेको यस विद्यालयमा माध्यमिक तहमा १ जनाको पनि दरबन्दी छैन । यी ३ जनाबाहेक अन्य प्राथमिक तहका शिक्षकहरुले धानेको यो विद्यालयमा कुल २३ जना शिक्षकहरु रहेका छन् । विद्यालयको आर्थिक स्रोत नहँुदा विद्यालय व्यवस्थापन गर्नु चुनौती नै बनेको उहाँको अनुभव छ । स्थानीय सरकारले दिएका विभिन्न शीर्षकका खर्चहरु तिनै शीर्षकमा सकिन्छन् । विद्यालयमा आइपर्ने विभिन्न भौतिक पूर्वाधार तथा मर्मत सम्भारका नदेखिने खर्चहरु व्यवस्थापन गर्न असहज भएको उहाँले गुनासो गर्नुभयो ।
प्रधानाध्यापकले प्राज्ञिक पक्षभन्दा विद्यालय व्यवस्थापनमा बढी ध्यान दिनुपरेको विषयसमेत उहाँलाई खड्किएको छ । यदि स्थानीय तहले सामुदायिक विद्यालयका सबै खर्चहरु मिलाइदिने हो भने शैक्षिक गुणस्तरमा पूर्ण ध्यान दिन पाइने उहाँको अपेक्षा छ । यसअघि एसईईका विद्यार्थीहरुलाई बन्द शिविरमा राखेर कक्षा सञ्चालन गरिएको र अन्य कक्षामा पछाडि परेका विद्यार्थीहरुलाई थप छुट्टै कक्षा लिएर सुधारको प्रयास गरेको विद्यालयले जनाएको छ ।
विद्यालयमा सकारात्मक सुधार ल्याउन विद्यालय व्यवस्थापन समिति र प्रधानाध्यापक तथा शिक्षकहरुको सक्रियता र समन्वय जरुरी भएको भन्दै अभिभावकलाई सचेत बनाउन सकिएमा विद्यालयको गुणस्तर सुधारको बाटो सुरु हुने उहाँले बताउनुभयो । स्थानीय तहले आर्थिक स्रोत साधन, अनुगमन गरी अभिभावकत्व देखाउने र सुधारका विभिन्न योजनाहरुको व्यवस्थापन गरेमा सामुदायिक विद्यालयहरु सुधारको बाटोमा लाग्ने उहाँको सुुझाव छ ।
