हेटौँडाः प्रतिबन्धित लागूऔषध खैरोहेरोइनसहित हेटौँडा–१३ पदमपोखरीका ३३ वर्षीय रामबहादुर गोले पक्राउ परेका छन् । मंगलबार दिउँसो ४ बजेर २० मिनेटको समयमा गोलेलाई लाई पक्राउ गरिएको जिल्ला प्रहरी कार्यालय मकवानपुरले जनाएको छ ।
पूर्व–पश्चिम राजमार्गअन्तर्गत हेटौँडा–१५ स्थित रातामाटे चेक पोईन्टमा सवारी साधनहरु रोकी चेकजाँच गर्ने क्रममा बिरगँजबाट नारायणघाटतर्फ जाँदै गरेको बा प्र ६–००१ ज ०४५१ नम्बरको यात्रुबाहक ईभि गाडीबाट उनलाई पक्राउ गरिएको हो । उनको साथबाट लागूऔषध खैरोहेरोईन जस्तो देखिने पदार्थ २ ग्राम १२० मिली ग्राम फेला परेको प्रहरीको भनाइ छ । मकवानपुर जिल्ला अदालतबाट लागूऔषधसम्बन्धी कसुरमा म्याद अनुमति लिई थप अनुसन्धान गरिरहेको प्रहरीले जानकारी दिएको छ ।
