हेटौंडा : हेटौंडेली गीतकार श्यामकुमार बानियाँको नयाँ म्युजिक भिडियो ‘दोबाटोमा कुर्दा कुर्दै आज पनि साँझ पर्यो’ बोलको गीत सार्वजनिक गरिएको छ । शुक्रबार हेटौंडामा एक कार्यक्रमबीच म्युजिक भिडियो सार्वजनिक गरिएको हो ।
कार्यक्रममा बोल्दै संगीतकार लाल श्रेष्ठले स्थानीय कलाकारको कला रचनालाई प्राथमिकता दिएर प्रोत्साहित गर्नुपर्ने बताउनुभयो । उहाँले संगीत, कला र संस्कृतिको पहिचान भएकोले गीत संगीतको माया गर्नुपर्नेमा जोड दिनुभयो । श्यामकुमार बानियाँको शब्द र विष्णु अधिकारीको स्वर तथा संगीतमा तयार भएको गीतको म्युजिक भिडियोमा अञ्जु मुक्तान र विजयकृष्ण श्रेष्ठको अभिनय रहेको छ । म्युजिक भिडियोको निर्देशन छेगुन लामाले गर्नुभएको हो ।
ओपाल रेकर्डिङ स्टुडियोमा रेकर्ड गरिएको सो म्युजिक भिडियोको छायाङ्कन तथा सम्पादन महेन्द्र ओझाले गर्नुभएको छ । हेटौंडा आसपास विभिन्न स्थानमा छायाङ्कन गरिएको म्युजिक भिडियो युट्युबमा समेत उपलब्ध छ । बानियाँको यो गीत दशौं गीत हो । बानियाँले ३ वर्षको बीचमा १० वटा गीत रचना गर्नुभएको छ । राष्ट्रिय गान ३ वटा, एउटा लोक–पप, आधुनिक गीत एउटा गाउनुभएको छ । १० वटा गीत मध्ये ४ वटा गीत बानियाँ आफैंले गाउनु भएको छ ।
