हेटौंडाः बिहीबार बिहान प्राप्त रिपोर्टअनुसार हेटौंडाका दुईजना पुरुषमा कोरोना सङ्क्रमण पुष्टि भएको छ । बुधबार नै पठाइएको नमूनामध्ये बिहीबार प्राप्त रिपोर्टअनुसार हेटौंडा–६ का ४९ वर्षीय पुरुष र हेटौंडा–१७ का ३१ वर्षीय पुरुषमा कोरोना सङ्क्रमण देखिएको हेटौंडा–४, कर्रास्थित आइसोलेसन वार्डका ईञ्चार्ज डा. अर्जुन खड्काले जानकारी दिनुभएको छ । बिहीबार संक्रमित भएका दुबैजना हेटौंडा अस्पतालको ज्वरो क्लिनिकबाट रेफर गरेर पठाइएका व्यक्तिहरु भएको डा. खड्काले बताउनुभएको छ ।
आइसोलेसन वार्डमा अहिले कोरोना सङ्क्रमित ११ जना उपचाररत छन् । बिहीबार आइसोलेसन वार्डबाट ३४ पुरुष र १७ महिलासहित ५१ जनाको स्वाब कोरोना परीक्षणका लागि किटजन्य रोग अनुसन्धान तथा तालिम केन्द्रमा सञ्चालित प्रयोगशालामा पठाइएको थियो । परीक्षणका लागि पठाइएका ५१ वटा नमूनामध्ये २१ जनामा संक्रमण नभएको पाइएको आइसोलेसन वार्डका जनस्वास्थ्य निरीक्षक भोला चौलागाईले जानकारी दिनुभएको छ । उहाँका अनुसार ३१ वटा नमूना भने संक्रमण नभएको भनी भन्न सक्ने अवस्थाको छैन । जसका कारण पुनः परीक्षणको कार्य भइरहेको र खतराको संकेत देखिएको उल्लेख गरिएको छ । जनस्वास्थ्य निरीक्षक चौलागाईको विश्लेषणले ठूलो संख्यामा संक्रमित पाइएको हुन सक्छ । बिहीबार स्पष्ट नतीजा दिन नसकिएका ३१ वटा नमूनाको आज शुक्रबार वास्तविक नतीजा प्राप्त हुने विश्वास गरिएको छ ।
केहीदिन यता जिल्लाभित्रै रहेका, जिल्लाबाहिर नगएकाहरुमा संक्रमण पुष्टि भएको छ । यसले हेटौंडा उपमहानगरपालिका र आसपासका क्षेत्रमा समुदायस्तरमै कोरोना भाइरस संक्रमण रहेको पुष्टि हुन्छ । बिहीबार आइसोलेसनमा रहेका १० जना मध्ये ८ जनामा कोरोना भाइरसको लक्षण देखिएको र २ जनाको अवस्थामा भने धेरै समस्या देखिएको आइसोलेसन वार्डले उल्लेख गरेको छ । कोरोना संक्रमित देखिएसँगै ती क्षेत्र सिल गर्ने गरिए पनि मुख्यतः बजार क्षेत्रमा भइरहेको भीड, सीमानामा हुनुपर्ने नियन्त्रण हुन सकेको छैन । बिहीबार मनहरी गाउँपालिकाका एकजना कोरोनामुक्त भएर डिस्चार्ज भएका छन् ।
