हेटौंडा: ६८औं राष्ट्रिय सहकारी दिवस हेटौँडामा पनि मनाइएको छ । बुधबार प्रदेशस्तरीय मूल आयोजक समितिको आयोजनामा प्रभातफेरीपछि सभाको आयोजना गरिएको थियो । सहकारी दिवसको अवसरमा हेटौँडा–११ स्थित बागेश्वरी महिला संहकारी संस्था लिमिटेडलाई उत्कृष्ट सहकारी घोषित गरिएको छ । र्यालीमा बागेश्वरी सहकारी समयमै उपस्थित हुनुका साथै उत्कृष्ट भेषभुषा प्रदर्शन गरिएकाले प्रथम हुन सफल भएको हो ।
यस्तै साना किसान सहकारी लिमिटेड हटिया द्वितीय, साना किसान सहकारी संस्था हर्नामाडी तृतीय, महिला मिलन सहकारी संस्था लिमिटेड, साना किसान सहकारी मनहरी, साना किसान सहकारी बसामाडी सान्त्वना हुन सफल भएको छ । प्रथम, द्वितीय, तृतीय र सान्त्वना हुनेलाई क्रमशः १० हजार रुपैयाँ, ७ हजार रुपैयाँ, ५ हजार रुपैयाँ र ३ हजार रुपैयाँ पुरस्कार प्रदान गरिएको छ । बागमती प्रदेश मूल समारोह समितिका संयोजक नारायण प्रसाद देवकोटाको अध्यक्षता तथा बागमती प्रदेश सरकार सहकारी तथा गरिबी निवारण मन्त्री मदुकुमार श्रेष्ठको प्रमुख आतिथ्यमा कार्यक्रम भएको थियोे । मन्त्री श्रेष्ठले कार्यक्रमलाई सम्बोधन गर्नुहुँदै सहकारी संस्थाहरुलाई सुशासनयुक्त रुपमा सञ्चालन तथा व्यवस्थापन गर्नमा महिलाहरुको महत्वपूर्ण भूमिका रहेको बताउनुभयो । सहकारी दिवसको अवसरमा महिलाहरुको उल्लेख्य सहभागिताले लैङ्गिक सशक्तीकरण र सामुदायिक विकासमा उल्लेखनीय योगदान पुगेको मन्त्री श्रेष्ठको भनाइ छ ।
कार्यक्रममा बागमती प्रदेश सभा सदस्य एकालाल श्रेष्ठ, हेटौँडा उपमहानगरपालिकाकी प्रमुख मीना कुमारी लामा लगायतको उपस्थिति रहेको थियोे । १४ गतेबाट विविध कार्यक्रम गरेर दिवस मनाउन मनाइएको थियोे । पहिलो दिन सबै संघ संस्थाको कार्यालयमा नारासहित ब्यानर, १८ गते अन्तरक्रिया कार्यक्रम, बुधबार प्रभातफेरी, प्रवचन, पुरस्कार र सम्मान गर्दै दिवस मनाएका छन् । यसैगरी साँझ दिप प्रजवलन कार्यक्रम समेत आयोजना गरिएको छ ।
