हेटौंडाः बागमती प्रदेश प्रहरी कार्यालयले मातहतका १४ वटै इकाईसँग तीन चरणमा कार्यसम्पादन करार गरेको छ । शनिबार प्रदेश राजधानी हेटौंडास्थित प्रदेश प्रहरी कार्यालयमा बागमती प्रदेशका आन्तरिक मामिला तथा कानून मन्त्री शालिकराम जम्कट्टेलको उपस्थितिमा प्रदेश प्रहरी कार्यालयले कार्य सञ्चालन समिक्षा तथा आगामी कार्यनीति सम्बन्धी छलफल समेत गरेको छ । नेपाल प्रहरीमा प्रदेश प्रहरी कार्यालय र मातहतका कार्यालय प्रमुखहरु बीच पहिलो पटक कार्यसम्पादन सम्झौता भएको बागमती प्रदेश प्रहरी कार्यालयले दावी गरेको छ ।
बागमती प्रदेश प्रहरी कार्यालयका प्रमुख प्रहरी नायव महानिरीक्षक बसन्त कुमार लामाले शनिबार बागमती प्रदेश प्रहरी तालिम केन्द्र, बागमति प्रदेश प्रहरी दंगा नियन्त्रण प्रहरी गण हेटौंडा र बागमती प्रदेश सशस्त्र प्रहरी गण मुख्यालय रातोमाटेसँग कार्य सम्पादन करार गर्नुभएको छ । बागमती प्रदेश प्रहरी कार्यालयले पहिलो चरणमा असार ५ गते धादिङ जिल्लामा कार्यसम्पादन आयोजना गरेको थियो । बागमती प्रदेशका आन्तरिक मामिला तथा कानून मन्त्री शालिकराम जम्कट्टेलको उपस्थितिमा बागमती प्रदेश प्रहरी प्रमुख प्रहरी नायव महानिरीक्षक बसन्त कुमार लामाले मातहतका ६ वटा कार्यालयका प्रमुखहरुसँग कार्यसम्पादन करार गर्नुभएको थियो ।
पहिलो चरण अन्तर्गतमा प्रदेश ट्राफिक प्रहरी कार्यालय रामनगर, जिल्ला प्रहरी कार्यालय मकवानपुर, चितवन, धादिङ, नुवाकोट र रसुवा रहेका थिए । दोस्रो चरण अन्तर्गत असार २७ गते काभ्रेमा बागमती प्रदेश प्रहरी कार्यालय र मातहतका ५ वटा जिल्ला प्रहरी कार्यालयका बीच कार्यसम्पादन करार भएको थियो । दोस्रो चरणमा प्रदेश प्रहरी कार्यालयले जिल्ला प्रहरी कार्यालय काभ्रे, सिन्धुपाल्चोक, सिन्धुली, रामेछाप र दोलखा जिल्लाका प्रहरी प्रमुखसँग कार्यसम्पादन करार गरिएको थियो ।
बागमती प्रदेश प्रहरी कार्यालयले तयार गरेको कार्यसम्पादन करारमा मातहतका कार्यालयहरुले मासिकरुपमा सम्पादन गर्नुपर्ने कार्यहरुको सुचक निर्धारण गरेको छ । सुचकले निर्धारण गरेका विषय अनुरुप कार्यसम्पादन गरी सार्वजनिक प्रशासन अन्तर्गत रहने प्रहरी प्रशासनको कार्यलाई स्तरीय, प्रभावकारी र कार्यको मुल्यांकन योग्य बनाउने, शान्ति सुरक्षा, अपराध अनुसन्धान तथा नियन्त्रण र आन्तरिक व्यवस्थापनलाई सुदृढ, विश्वसनीय र व्यावसायिक बनाउने उद्देश्यले मातहातका कार्यालय प्रमुखहरुसँग कार्यसम्पादन करार गरिएको प्रदेश प्रहरी कार्यालयले जनाएको छ । कार्यसम्पादन करारको तीनै चरणमा प्रदेश प्रहरी अन्तर्गतका प्रहरी कार्यालयहरुको कार्य सञ्चालन सम्बन्धी जानकारी लिनुका साथै मातहत कार्यालयहरुको समस्या, चुनौती र अपेक्षाहरुको बारेमा जानकारी लिइएको थियो ।
