हेटौँडाः मकवानपुर प्रहरीले हेटौँडा–१९ नेवारपानीबाट लागूऔषध गाँजासहित २ जनालाई पक्राउ गरेको छ । बिहीबार दिउँसो ४ बजेर ३० मिनेटको समयमा धादिङको रोराङ गाउँपालिका–२ ताल्तीका ३५ वर्षीय सोमिलाल चेपाङ र २० वर्षीय किशोर चेपाङलाई पक्राउ गरिएको जिल्ला प्रहरी कार्यालय मकवानपुरले जनाएको छ ।
इलाका प्रहरी कार्यालय नेवारपानी मकवानपुरबाट खटिएको प्रहरी टोलीले नेवारपानी स्थित पुर्व पश्चिम सडकखण्डमा चितवनबाट हेटौँडातर्फ आउँदै गरेको लु ३ ख १७४१ नम्बरको यात्रुवाहक बसलाई सुरक्षा जाँच गर्दा बसमा सवार उनिहरुको साथबाट लागूऔषध गाँजा बरामद गरेको हो । प्रहरीले सोमिलाल र किशोरले बोकेको झोला भित्र लुकाई छिपाई ल्याइएको अवस्थामा १४ किलो ८३० ग्राम लागूऔषध गाँजा फेला पारेको जनाएको छ । लागूऔषध गाँजासहित सोमिलाल र किशोरलाई नियन्त्रणमा लिई थप अनुसन्धानका भइरहेको प्रहरीले जानकारी दिएको छ ।
