हेटौँडाः नेकपा एमाले हेटौंडा उपमहानगरपालिकाको अधिवेशन अन्तर्गत नयाँ नेतृत्व चयनका लागि मतदान सुरु भएको छ । मंसिर २९ बाट सुरु भएको एमाले हेटौंडाको दोस्रो अधिवेशन अन्तर्गत आइतबार मनोनयन दर्ता कार्यक्रम भएको थियो भने आज सोमबार नेतृत्व चयनका लागि मतदानको कार्यक्रम रहेको छ ।
११ बजेदेखि सुरु भएको मतदान कार्यक्रम दिउँसो २ बजेसम्मका लागि समय तोकिएको छ। अधिवेशन अन्तर्गतको निर्वाचन कार्यक्रममा एमाले हेटौंडाको अध्यक्षमा २ जनाबीच प्रतिस्पर्धा हुने भएको छ । एमाले हेटौंडा उपमहानगर कमिटिमा बोलबहादुर कार्की र जेन श्रेष्ठबीच अध्यक्षमा प्रतिस्पर्धा हुने भएको हो । उपाध्यक्षमा ३ जनाको उम्मेदवारी परेको छ । उपाध्यक्षमा इन्द्रप्रसाद खतिवडा, धनबहादुर मुक्तान राजकुमार बास्तोलाको उम्मेदवारी परेको छ ।
यस्तै सचिवमा प्रकाश बानियाँ र शान्ता गौतम (प्रदिप) बीच प्रतिष्पर्धा हुनेछ । उपसचिव (खुल्ला) मा ५ जनाको उम्मेदवारी परेको छ । उक्त पदमा अर्जुनप्रसाद अर्याल, कवि रेग्मी, सुरेश मिजार (बेरोजगार), शान्तेकुमार लामा तामाङ र शिवबहादुर थापाको उम्मेदवारी रहेको छ ।
यस्तै उपसचिव महिला तर्फ ३ जनाको उम्मेदवारी रहेको छ । उक्त पदमा चन्द्रावती पनेरु अधिकारी, जुना दंगाल र रञ्जिता सिलवालको उम्मेदवारी रहेको छ । ३३४ प्रतिनिधि रहेको निर्वाचनले ८१ सदस्यीय हेटौंडा उपमहानगर कमिटी निर्माण गर्ने प्रमुख निर्वाचन अधिकृत अर्जुन अर्यालले बताउनुभयो ।
