हेटौँडाः मकवानपुरगढी गाउँपालिकाको प्रमुख प्रशासकीय अधिकृतको रुपमा सुधन लामिछानेले जिम्मेवारी सम्हाल्नु भएको छ । आइतबार गाउँपालिकामा उपस्थित भएर लामिछानेले जिम्मेवारी सम्हाल्नु भएको पालिकाका अधिकृत रघुनाथ हुमागाईले जानकारी दिनुभयो ।
लामिछानेलाई गाउँपालिकाका अध्यक्ष दोर्जे लामा स्याङ्तान र उपाध्यक्ष मान कुमारी पाख्रिनले स्वागत गर्नु भएको थियो । लामिछाने मकवानपुरगढीको आठौँ प्रमुख प्रशासकीय अधिकृत हुनुहुन्छ । लामिछाने यसअघि बारा जिल्लाको विश्रामपुरमा कार्यरत रहनु भएको थियो ।
गत असोज ६ गतेदेखि मकवानपुरगढी प्रमुख प्रशासकीय अधिकृतविहीन बनेको थियो । यसअघिका प्रमुख प्रशासकीय अधिकृतमा नवीन गङ्तान लामा रहनु भएको थियो । गत जेठ ६ गते प्रमुख प्रशासकीय राजेन्द्र काकी सरुवा भएपछि आउनुभएका लामा असोज ६ गतेबाट पालिकामा अनुपस्थित रहनुभयो । आइतबार लामिछानेलाई स्वागत गरेसँगै लामालाई पनि विदाई गरिएको हुमागाईले जानकारी दिनुभयो । लामा मकवानपुरगढीबाट सरुवा भएर संघीय उद्योग मन्त्रालय जानुभएको छ ।
