हेटौँडाः हेटौँडा–१३, पदमपोखरीस्थित महेन्द्र माध्यमिक विद्यालयको ५४ औं अभिभावक भेला आइतबार सम्पन्न भएको छ । भेलाबाट व्यवस्थापन समिति पुनर्गठनको प्रयास गर्दा २६ जना अभिभावकको उम्मेदवारी दर्ता गराएका छन् । २ जना महिला अभिभावक चयन गर्नुपर्नेमा १६ जनाको र २ जना खुलातर्फ १० जनाको उम्मेदवारी परेको विद्यालयका प्रधानाध्यापक विष्णु श्रेष्ठले जानकारी दिनुभएको छ ।
व्यवस्थापन समिति सदस्य बन्न उम्मेदवारी दर्ता गराउने सबै वास्तविक अभिभावक भए नभएको जाँच गरी सोमबार सहमतिको प्रयास गरिने प्रधानाध्यापक श्रेष्ठले बताउनुभएको छ । विद्यालय व्यवस्थापन समितिका अध्यक्ष शंकर बहादुर रोक्काको अध्यक्षता तथा बागमती प्रदेश सभा सदस्य एका लाल श्रेष्ठको प्रमुख आतिथ्यमा अभिभावक भेला समारोह भएको हो । कार्यक्रममा वडाअध्यक्ष पेम्बा लामा, वडा सदस्यहरु उत्तम गोम्जा र रञ्जु गोम्जा, पूर्वविद्यार्थी समाजका अध्यक्ष दिलबहादुर स्याङ्बोसहित स्थानीय विभिन्न संघ, संस्थाका प्रतिनिधिको सहभागिता रहेको थियो ।
अभिभावक भेलाको अवसरमा कक्षागत उत्कृष्ट विद्यार्थी, नियमित विद्यालय उपस्थित हुने विद्यार्थीलाई पुरस्कृत गरिएको छ । यस्तै उत्कृष्ट नतीजा हासिल गर्न सहयोग गर्ने शिक्षक, कर्मचारी, विद्यालयलाई सहयोग गर्ने व्यक्ति, संघ, संस्थालाई सम्मान गरेको छ । १२ कक्षासम्म पठनपाठन हुने विद्यालयमा ९ सय ७९ जना विद्यार्थी अध्ययनरत छन् । अभिभावक भेलामा विद्यालयका प्रधानाध्यापक विष्णु श्रेष्ठले विद्यालयको प्रगति प्रतिवेदन प्रस्तुत गर्नुभएको थियो ।
प्रधानाध्यापक श्रेष्ठले विद्यालयको भौतिक अवस्था राम्रो रहेको उल्लेख गर्नुहुँदै टाढाका विद्यार्थीलाई विद्यालय आउजाउ गर्न बस थप्नुपर्ने अवस्था रहेको बताउनुभयो । अहिले विद्यालयको एउटा बस सञ्चालनमा रहेको छ । विद्यालयको शैक्षिक गुणस्तरमा थप सुधार गर्न अभिभावकको भूमिका बढाउन पनि आवश्यक रहेको उहाँको भनाइ छ ।
