हेटौँडाः बागमती प्रदेश सरकारले प्रदेश नीति तथा योजना आयोगको उपाध्यक्षमा गंगादत्त नेपाललाई नियुक्त गरेको छ । बुधबार बसेको मन्त्रिपरिषद् बैठकले नेपाललाई आयोगको उपाध्यक्ष पदमा नियुक्त गरेको हो ।
सिन्धुपाल्चोक जिल्लाको हेलम्बुका गंगादत्त नेपाल खानेपानी, सरसफाई तथा जलवायू परिवर्तनका विज्ञ हुनुहुन्छ । उहाँ हाल विभिन्न संघ, संस्था र सरकारलाई विज्ञ परामर्शदाताको रुपमा सेवा प्रदान गर्दै आएका छन् । जर्मन र नेपालबाट स्नात्तकोत्तर तहको अध्ययन पूरा गर्नुभएका तथा खानेपानी तथा जलवायू सम्बन्धमा विद्यावारिधी गर्नुभएका गंगादत्तले २१ वर्ष नेपाल सरकारको कर्मचारीको रुपमा काम गर्नुभएको थियो । जागिरे जीवनको ११ वर्ष बाँकी रहँदा नेपालले पदबाट राजिनामा गरेर विभिन्न दातृ निकायको कार्यक्रमको संयोजकको रुपमा काम गरेको अनुभव छ । डब्लुएचओ, युएसएआइडीद्वारा संचालित विभिन्न कार्यक्रमको जिम्मेवारीमा रहेर काम गर्नुभएका उहाँले मेलम्चीमा विपद् व्यवस्थापन विषयको कार्यक्रममा समेत नेतृत्व गर्नुभएको छ ।
मन्त्रिपरिषद् बैठकले आयोगमा २ सदस्य समेत नियुक्त गरेको छ । आयोगको सदस्यमा काठमाडौंका दीपेन्द्र श्रेष्ठ र काभ्रेका गुणराज मोक्तान नियुक्त हुनुभएको छ । आयोगमा अझै २ सदस्य रिक्त रहेको छ । आयोगमा एक महिलासहित २ सदस्य नियुक्त हुन सकेका छैनन् । सरकारका प्रवक्ता एवम् आन्तरिक मामिला तथा कानुन मन्त्री सुरजचन्द्र लामिछानेले छिट्टै नै थप २ सदस्यको नियुक्तिको विषयमा पनि सरकारले निर्णय गर्ने जानकारी दिनुभएको छ ।
