हेटौँडाः कृषि तथा वन विज्ञान विश्वविद्यालय (एएफयु) वन विज्ञान संकायले स्नातक तह (बीएस्सी) अध्ययनका लागि आवेदन खुला गरेको छ । संकायले साउन ३० गते बुधबारदेखि भदौ २४ गतेसम्म स्नातक तहमा वन विज्ञान अध्ययन गर्न चाहने विद्यार्थीका लागि आवेदन खुलाएको हो ।
वन विज्ञान संकायको स्नातक तह (बीएससी) का लागि हेटौँडामा ८५ जना विद्यार्थीको कोटा रहेको संकायका उपप्रशासक प्रदीपकृष्ण श्रेष्ठले जानकारी दिनुभयो । यस्तै, एएफयु वन विज्ञान संकायले उदयपुर जिल्लाको कटारीमा ५४ जना र पश्चिम नवलपरासीको गैंडाकोटमा ५० जनाको कोटामा आवेदन खुलाएको छ ।
एएफयु वन विज्ञान संकायको तथ्याङ्कअनुसार विद्यार्थीहरुले बीएससी अध्ययनका लागि आवेदन दिने क्रम कम भएको छ । २०७६ सालमा बीएससीका लागि एक हजार १५ जना विद्यार्थीले आवेदन दिएका थिए । २०७७ सालमा एक हजार ४३ जना, २०७८ सालमा ८ सय ५३ जना, २०७९ सालमा ४ सय ४० जना र २०८० सालमा २ सय ८३ जना विद्यार्थीले आवेदन दिएका थिए ।
यस्तै, त्रिभुवन विश्वविद्यालयअन्तर्गतको वन विज्ञान अध्ययन संस्थान, हेटौंडा क्याम्पसले वन विज्ञानमा स्नातक तह (बीएससी) अध्ययन गर्न चाहने विद्यार्थीका लागि साउन ९ गतेदेखि आवेदन खुला गरिसकेको छ । ८२ जना विद्यार्थी अध्ययन गराउने गरी खुला गरिएको आवेदन दिने समय आगामी भदौ १२ गतेसम्म रहेको छ ।
वन विज्ञान अध्ययन संस्थानको हेटौंडा क्याम्पसमा यसअघि ८० जना विद्यार्थीको कोटा रहेकोमा यसवर्ष विदेशी विद्यार्थीका लागि दुईवटा कोटा थप गरिएको छ । वन विज्ञान अध्ययन संस्थान हेटौँडा क्याम्पसको स्नातक तहमा यसवर्ष ७६ जना विद्यार्थी उत्तीर्ण भएका छन् ।
