हेटौंडाः हेटौंडा–१ स्थित मकवानपुर सहकारी अस्पतालमा लफडा भएको छ । अस्पताल प्रशासन र डाक्टरको कारण एक बालकको मृत्यु भएपछि अस्पतालमा तनाव सिर्जना भएको हो ।
आइतबार हेटौंडा–१६ स्थित हटियाका १ वर्षीय बालकको मृत्यु भएपछि पीडित पक्षले प्रशासन र डाक्टरको लापरबाहीले आफ्नो बालकको मृत्यु भएको भन्दै शव बुझ्न मानेका छैनन् । मृतक बालकका बुबा अनिल श्रेष्ठका अनुसार तीन दिन अगाडि घरबाट ज्वरो आउनुको साथै मुखमा सानो घाउ आएपछी बालकलाई अस्पताल ल्याइएको थियो । बिरामी बालकलाई आइसियुमा राखेर ४–५ दिनपछि डिस्चार्ज गर्छु भनेका थिए । उपचारका क्रममा डाक्टर तथा नर्सहरु समयमा औषधि चढाउन समय नआउने र बोलाउँदासमेत बेवास्ता गरेको उहाँको भनाई छ । पीडित पक्षले डा.हरि बहादुर खड्काले लापरबाही गरेको आरोप लगाएका छन् ।
अहिले प्रहरीले पीडित पक्ष र अस्पताल प्रशासनसँग बसेर वार्ता गर्ने तयारी गरिरहेको छ । तर डाक्टर नै अनुपस्थित भएपछि वार्ता चल्न सकेको छैन ।
