हेटौंडाः पुरस्कार उपलब्ध गराइदिन माग गर्दै बागमती प्रदेशका युवा तथा खेलकुदमन्त्री मीनकृष्ण महर्जनलाई ध्यानाकर्षणपत्र बुझाइएको छ । खेलाडी संघले नवौं राष्ट्रिय खेलकुद प्रतियोगितामा घोषणा भएको पुरस्कार उपलब्ध गराउन माग गर्दै मन्त्री महर्जनलाई ध्यानाकर्षणपत्र बुझाएको हो ।
बिहीबार हेटौंडा–६ स्थित युवा तथ खेलकुद मन्त्रालयमा खेलाडी संघका केन्द्रीय सदस्य अजित गुरुङ नेतृत्वको समूहले मन्त्री महर्जनलाई ध्यानाकर्षण गराएको हो । गत २०७९ असोज २८ गतेदेखि कात्तिक ३ गतेसम्म सम्पन्न ९ औं राष्ट्रिय खेलकुद प्रतियोगितामा बागमती प्रदेशबाट प्रतिनिधित्व गरी पदक विजेता खेलाडीलाई नगद पुरस्कार दिने घोषणा भएको गुरुङले बताउनुभयो ।
स्वर्ण, रजत तथा कास्य पदक प्राप्त गरेका खेलाडीहरुलाई प्रोत्साहनस्वरुप प्रदेशबाट क्रमशः १ लाख, ७५ हजार र ५० हजार रुपैयाँका दरले नगद पुरस्कारसहित सम्मान गर्ने घोषणा गरिएको उहाँले बताउनुभयो । उक्त खेलकुद प्रतियोगिता सम्पन्न भएको २ वर्षसम्म पनि पुरस्कार प्राप्त हुन नसकेकाले सो विषयमा तत्काल पहल गर्न मन्त्री महर्जनलाई ध्यानाकर्षण गराइएको उहाँको भनाइ छ ।
प्रतियोगिता सम्पन्न भएको लामो अवधिसम्म प्रदेश सरकारबाट पूर्वघोषित पुरस्कार प्राप्त नहुँदा खेलाडीहरुको गुनासो बढिरहेको र पदक प्राप्त खेलाडीमा निराशा छाएको उहाँले बताउनुभयो । उहाँका अनुसार निकट भविष्यमा नै हुने १० औं राष्ट्रिय खेलकुद प्रतियोगिता अगावै पूर्वघोषित नगद पुरस्कार खेलाडीहरुलाई उपलब्ध गराउन माग गरिएको छ । पुरस्कार उपलब्ध गराउन सकेको खण्डमा खेलाडीहरु अझ उत्साहित भएर आगामी प्रतियोगितामा प्रदर्शन गर्ने र बढी पदक जित्न सकिने उहाँले विश्वास व्यक्त गर्नुभयो । उक्त प्रतियोगितमा बागमती प्रदेशले २४ स्वर्ण, ४७ रजत र ७४ काश्यसहित १४५ पदक जितेको थियो ।
खेलाडीको हितका लागि प्रतिवद्ध छुः मन्त्री महर्जन
खेलाडीहरुको माग सम्बोधन गर्दै मन्त्री महर्जनले खेलाडीहरुको हक हित र प्रेत्साहनमा आफू प्रतिवद्ध रहेको बताउनुभयो । खेलकुद क्षेत्रको विकास र खेलाडीको प्रोत्साहनका लागि आफूले इच्छा गरेर खेलकुद मन्त्रालयको जिम्मेवारी लिएको उहाँले बताउनुभयो ।
खेलाडीहरुले प्राप्त गर्नुपर्ने पुरस्कार रकमका लागि विभागीय मन्त्रीको हैसियतले प्रदेश सरकारसमक्ष दवाव बढाउने उहाले बताउनुभयो । आफू मन्त्री भएलगत्तै खेलाडीहरुको पुरस्कारको विषयलाई गम्भिरताका साथ अघि बढाएको र सो विषयमा मुख्यमन्त्री र अर्थ मन्त्रीसँग निरन्तर छलफल गरिरहेको उहाँको भनाइ छ ।
मन्त्री महर्जनका अनुसार खेलाडीहरुको विषयमा मुख्यमन्त्री र अर्थमन्त्री सकारात्मक रहेका छन् । मन्त्रालयबाट उक्त विषयमा स्पष्ट कार्ययोजनासहित पुनः मुख्यमन्त्री र अर्थ मन्त्रालयमा पत्राचार गरेर पुरस्कार रकम निकासाको पहल गर्ने मन्त्री महर्जनले बताउनुभयो ।
