हेटौँडाः छिमेकी मुलुक भारतको सिक्किम राज्यमा भएको ७८ औं इन्डिपेन्डेन्ट डे फुटबल प्रतियोगिताको उपाधि मकवानपुरको हेटौँडा फुटबल एकेडेमीले जितेको छ ।
बिहिबार सिक्किमस्थित मुनसुङ खेलमैदानमा सम्पन्न भएको फाइनल खेलमा घरेलु टोली वेष्ट बंगालको बरमेक क्लबलाई २–१ गोलअन्तरले हराउँदै हेटौँडा फुटबल एकेडेमीले उपाधि जितेको हो ।
उपाधिसँगै हेटौँडा फुटबल एकेडेमीले भारतीय एक लाख रुपैयाँसहित शिल्ड, मेडल तथा प्रमाणपत्र प्राप्त गरेको छ । उपविजेता बरमेक क्लबले भारतीय ६० हजार रुपैयाँसहित शिल्ड, मेडल तथा प्रमाणपत्र प्राप्त गरेको छ । एकेडेमीको जीतमा छिरिङ तामाङ र ऋतिक श्रेष्ठले समान एक–एक गोल गरे ।
आइतबार भएको पहिलो सेमिफाइनल खेलमा भारतको मामरिङ सिक्किम क्लबलाई २–१ गोलले हराउँदै हेटौँडा फुटबल एकेडेमीले फाइनल यात्रा तय गरेको थियो । अगष्ट १ गेतबाट सुरु भएको प्रतियोगितामा १९ वटा टिमको सहभागिता रहेको थियो । गत वर्ष हेटौँडा फुटबल एकेडेमी उपविजेता बनेको थियो ।
उपाधिसाथ हेटौँडा फुटबल एकेडेमीको टिम ।
