हेटौँडाः बागमती प्रदेशका स्वास्थ्य मन्त्री किरण थापाले आम नागरिकको पहुँचमा गुणस्तरीय स्वास्थ्य सेवा पुर्याउनु जरुरी रहेको बताउनुभएको छ । उहाँले नागरिकले अपनत्व ग्रहण गर्नेगरी नीति कार्यक्रम र योजना निर्धारण गरेर सेवा प्रवाहलाई प्रभावकारी बनाउनु पर्ने बताउनुभयो ।
सेभ द चिल्ड्रेनको ग्लोबल फण्ड अनुदान मार्फत् निर्माण गरिएको स्वास्थ्य सामग्री भण्डारण भवन हस्तान्तरण कार्यक्रममा बोल्नुहुँदै मन्त्री थापाले नागरिकहरुको गुनासो सम्बोधन गर्दै विकट क्षेत्रमा सरकारका सेवा सुविधा र गुणस्तरीय स्वास्थ्य सेवाको पहुँच वृद्धि गर्नुपर्ने चुनौति रहेको बताउनुभयो । नागरिकको आवश्यकताका आधारमा तीन तहको सरकारसँगको समन्वयमा स्वास्थ्य उपचार सेवालाई गुणस्तरीय बनाउनु गम्भीर हुनुपर्ने अवस्था रहेको उहाँको भनाई छ ।
उहाँका अनुसार विगतमा केही कमिकमजोरी र त्रुटिका कारण नागरिक स्वास्थ्य सेवाबाट बन्चित हुनुपर्ने तथा सामान्य औषधी उपचारबाट पनि टाढा रहनु परेको थियो । सो विषयलाई सम्बोधन गरेर पीछडिएका वर्गलाई समेत स्वास्थ्य सेवाको मुलधारमा ल्याउन भूमिका खेल्नुपर्ने उहाँको भनाई छ । प्रदेश सरकारसँग पर्याप्त भौतिक संरचना नहुँदा औषधी तथा भ्याक्सिनजन्य सामग्रीहरुको भण्डारणमा समेत समस्या हुँदै आएको उहाँले औँल्याउनुभयो । नयाँ भवन प्राप्त भएसँगै भण्डारणका कारण औषधीजन्य पदार्थको गुणस्तर कायम गर्न तथा व्यवस्थापनमा समस्या भोग्नु परेको अवस्था अन्त्य भएको उहाँले बताउनुभयो ।
‘प्रदेशस्तरको स्वास्थ्य प्रणाली सुदृढ गर्न सेभ द चिल्ड्रेन र ग्लोबल फण्डको महत्वपूर्ण भूमिका रहेको छ । सेभ द चिल्ड्रेनको सहयोगमा नवनिर्मित भवन विविध प्रकारका औषधि तथा चिकित्सा क्षेत्रको सामग्रीहरु उचित तवरले भण्डारण गर्न निकै उपयोगी हुनेछ । विशेषगरी स्वास्थ्य सेवाबाट बञ्चित सर्वसाधारणको औषधीसम्बन्धी आवश्यकतालाई सम्बोधन गर्ने सो भवन प्रभावकारी हुनेछ ।’ उहाँले भन्नुभयो ।
सेभ द चिल्ड्रेन नेपालकी राष्ट्रिय निर्देशक तारा क्षेत्रीले स्वास्थ्य सेवा आपूर्तिलाई सुदृढ बनाउनुका नवनिर्मित भवन उपयोगी हुने बताउनुभयो । सरकारको विकेन्द्रीकृत र पहुँचयोग्य स्वास्थ्य प्रणालीको अवधारणा अनुरुप सो भवन निर्माण गरिएको उहाँको भनाई छ । उहाँले आवश्यक औषधिहरुको आपूर्ति र मागको व्यवस्थापनमा भवनले सहयोग पु¥याउने बताउनुभयो । क्षयरोग, औलो, एचआईभी सम्बन्धी स्वास्थ्य सेवाहरु र औषधिहरु प्रभावित नागरिकको पहुँचमा पु¥याउन तथा अस्पताल र फार्मेसीहरुबीचको समन्वयलाई सुधारमा महत्वपूर्ण हुने उहाँले विश्वास व्यक्त गर्नुभयो ।
