हेटौँडाः बागमती प्रदेशका नवनियुक्त मुख्यमन्त्री बहादुर सिं लामाले जनतालाई सुशासनको प्रत्याभूति दिलाउने गरी सरकारको कामकाज अघि बढाउने बताउनुभएको छ । मुख्यमन्त्री लामाले नागरिकको अपेक्षा अनुसारको विकास र सेवा प्रवाहमा प्रदेश सरकार संवेदनशील भएर अघि बढ्ने बताउनुभयो ।
बुधबार पदभार ग्रहणपछि सञ्चारकर्मीहरुसँग कुराकानी गर्नुहुँदै मुख्यमन्त्री लामाले जनताको आवश्यकता अनुसारको योजनामा काम गर्ने बताउनुभयो । सुशासन र वित्तीय अनुशासन कायम गरी गरिब, निमुखीका लागि प्रदेश सरकारले शिक्षा, स्वास्थ्य, खानेपानी लगायतका क्षेत्रहरुमा प्राथमिकता दिएर काम गर्ने उहाँको भनाई छ । प्रदेश सरकारले उत्पादनमूलक क्षेत्रमा लगानी गरी नागरिकको आयआर्जन वृद्धिमा जोड दिने मुख्यमन्त्री लामाले स्पष्ट पार्नुभयो ।
मुख्यमन्त्री लामाका अनुसार संविधानको व्यवस्था अनुसारको अधिकार कार्यान्वयनमा प्रदेश सरकार गम्भिरताका साथ अघि बढ्नेछ । प्रदेशको एकल अधिकारलाई सुनिश्चित गर्ने सरकारको प्राथमिकतामा रहेको उहाँले बताउनुभयो । संघ, प्रदेश र स्थानीय तहकोे कानुनलाई समन्वयकारी बनाएर आर्थिक समृद्धिमा अगाडि बढ्ने मुख्यमन्त्री लामाको भनाई छ । तीन वटै तहका सरकारले देख्ने कामको सुनिश्चित गर्नेगरी वर्तमान गठबन्धन सरकारले काम गर्ने मुख्यमन्त्री लामाले उल्लेख गर्नुभयो । राजनीतिक स्थायित्वका लागि वर्तमान गठबन्धन सरकारले उपलब्धीमूलक काम गर्ने उहाँको दावी छ ।
