हेटौंडाः मकवानपुरगढी गाउँपालिकाले १० कक्षामा अध्ययनरत विद्यार्थीलाई अतिरिक्त कक्षा सञ्चालन गरी एक महिना आवासीय छात्रवासमा राख्ने भएको छ । गाउँपालिकाले विद्यार्थीको शैक्षिक गुणस्तर वृद्धि गर्ने उद्देश्यले अतिरिक्त कक्षा सञ्चालनसहित होस्टेलमा राख्न लागेको गाउँपालिकाका स्रोत शिक्षक दाशरथि उपाध्याय भण्डारीले जानकारी दिनुभयो ।
गाउँपालिकाभित्र रहेका १० वटा माध्यमिक विद्यालयका छात्रालाई मकवानपुरगढी गाउँपालिका–५ स्थित शारदा माविमा र छात्रलाई मकवानपुरगढी गाउँपालिका–२ स्थित चण्डिका माविमा होस्टेलमा राखिने भण्डारीले जानकारी दिनुभयो । यसवर्ष कक्षा १० मा २ सय जना विद्यार्थी अध्ययनरत रहेका छन् ।
२०८० सालको एसईई परीक्षामा मकवानपुरगढीका विद्यालयबाट न्यून विद्यार्थी पास भएका थिए । ३ सय जना विद्यार्थीले एसईई परीक्षा दिएकोमा ४५ जनामात्र उत्तीर्ण भएका थिए । गाउँपालिकाको शैक्षिक पात्रोअनुसार पहिलो त्रैमासिक परीक्षापश्चात् साउन १ गतेदेखि ३२ गतेसम्म विद्यार्थीहरुलाई होस्टेलमा राखेर पढाउने भएको हो ।
पहिलो त्रैमासिक परीक्षा असार २४ गते सोमबारदेखि ३१ गतेसम्म सञ्चालन हुनेछ । विद्यार्थीलाई होस्टेल राख्नुको उद्देश्य विद्यार्थीमा पठन संस्कृतिको विकास गराउन, गत वर्षभन्दा राम्रो नतिजा हासिल गर्न, शिक्षाको गुणस्तर वृद्धि गर्न, परीक्षापश्चात् वर्षे बिदाको समयमा विद्यार्थीहरुको ध्यान पढाईबाट नहटोस् भन्ने रहेको छ । यसबारे गाउँपालिकाले विद्यालयलाई परिपत्र गरिसकेको भण्डारीको भनाइ छ ।
