हेटौँडाः बागमती प्रदेशका सांसद उत्तम जोशीले सरकार आफै अन्योलतामा रहेको बताउनुभएको छ । उहाँले सरकारको लय कता जाँदैछ भन्नेमा अन्योल रहेको बताउनुभएको हो ।
आगामी आर्थिक वर्षको लागि विनियोजित बजेट माथिको छलफलका क्रममा प्रदेशसभा बैठक बोल्नुहुँदै कांग्रेसका सांसद एवम् पुर्व स्वास्थ्य मन्त्रीसमेत रहनुभएका जोशीले सरकार आफ्नो गन्तव्यमा हिँड्न नसकेको आरोप लगाउनुभयो ।
सांसद जोशीले प्रदेश सरकार लोकप्रियता कमाउन मात्र खोजिएको र सही गन्तव्यमा हिँड्न नसकिरहेको बताउनुभयो । प्रदेश सरकार घाटाको बजेट प्रस्तुत गर्दै नयाँ संरचना थप्दै गइरहेको, लक्ष्य अनुसारको राजस्व पनि नउठेको र संघीय सरकारले दिएको अनुदान पनि कम भएको अवस्थामा बजेट रकम बढाएर ल्याएको बताउनुभयो ।
उहाँले संसदमा बजेट विनियोजनबारे छलफल चल्दा सरकार सुन्ने मात्र र कुनै प्रतिक्रिया नआउने गरेको बताउनुभयो । प्रदेशले ल्याएको बजेटले संघीयतालाई सबलीकरण गर्छ भनेर आफुलाई विश्वास नलागेको उहाँको भनाई छ । सरकारले ल्याउने बजेट सन्तुलन हुनुपर्ने भएपनि अहिले बजेटप्रति सत्ता र प्रतिपक्षीहरु नै उमङ्ग नभएको उहाँले बताउनुभयो । प्रदेश सभा भरिभराउन हुनुपर्ने भएपनि पनि मन्त्रीहरु नै उपस्थित नभएर सरकार जिम्मेवार नबनेको उहाँले आरोप लगाउनुभयो । भद्रगोल अवस्थामा ल्याएको बजेटले लक्ष्य निर्धारण नगरेको उहाँले बताउनुभयो ।
