हेटौँडाः बागमती प्रदेशसभाका सदस्य इन्द्र बहादुर बानियाँले मदन भण्डारी स्वास्थ्य विज्ञान प्रतिष्ठान ऐन २०७६ संशोधन गर्न माग गर्नुभएको छ । प्रदेशसभाको शुक्रबार बसेको बैठकमा विशेष समय माग गरेर उहाँले हेटौँडा अस्पताल र प्रतिष्ठान बीचको विवाद समाधान गर्न ऐन संशोधन गर्नुपर्ने बताउनुभएको हो । हेटौँडा अस्पताल प्रादेशिक अस्पतालको रुपमा संघीय सरकारबाट हस्तान्तरण भएकाले त्यसको अस्तित्व मास्न नहुने उहाँको भनाई छ ।
‘सरकारको निर्णयका कारण विशेष समय माग गरिएको हो । सरकारले प्रादेशिक अस्पताल निर्माण गर्ने निर्णय किन गर्यो ? विवादित भइरहेको अवस्थामा राजनीतिक दलहरुसँग छलफल नै नगरी किन हतारमा सरकारले मकवानपुरमा प्रादेशिक अस्पताल निर्माण गर्ने निर्णय गरिरहेको छ ?’ उहाँले प्रश्न गर्नुभयो, ‘संघीय सरकार अन्तर्गतको हेटौँडा अस्पताल प्रादेशिक अस्पताल प्रदेश सरकारलाई हस्तान्तरण हो । मदन भण्डारी स्वास्थ्य विज्ञान प्रतिष्ठान संचालन ऐन गलत छ । हेटौँडा अस्पतालको चल–अचल सम्पत्ती मदन भण्डारीको हुन्छ भन्ने निर्णय कहाँ गरिएको छ ? प्रतिष्ठानको ऐन परिमार्जन गर्नुपर्छ ।’
संघीय सरकारबाट व्यवस्थापकीय जिम्मा प्रदेश सरकारलाई दिइएकाले प्रतिष्ठानको नाममा अस्पतालको सम्पत्ती माथि हस्तक्षेप गर्न अधिकार नरहेको उहाँले बताउनुभयो । मेडिकल अध्यापन गराउने उद्देश्यले स्थापना गरिएको प्रतिष्ठान विवादमा पर्दा गरिमा घट्दै गएको उहाँले दावी गर्नुभएको छ । प्रतिष्ठानको कार्ययोजनामा ध्यान नदिई सरकारले विवाद थप गर्न स्थायी कर्मचारीलाई हटाएर करारका कर्मचारीलाई अधिकार दिने काम गरिरहेको उहाँको भनाई छ ।
‘प्रतिष्ठान र अस्पतालको समस्या समाधानमा सरकारले ध्यान दिन छोडेर प्रादेशिक अस्पताल निर्माणमा सरकारले निर्णय गरेको छ । हेटौँडा अस्पताललाई प्रादेशिक अस्पतालको रुपमा विकास गरेर अघि बढ्नु पर्छ ।’ उहाँले भन्नुभयो । उहाँले हेटौँडा अस्पताललाई प्रादेशिक अस्पतालको रुपमा विकास गर्न माग गर्नुभएको छ ।
