हेटौंडाः मकवानपुरको बागमती गाउँपालिका–५, बगेरीमा रहेको बागमती आधारभूत विद्यालयले गर्मीका कारण विद्यार्थीहरुलाई चौतारामा राखेर पठनपाठन गरिरहेको छ । अत्यधिक गर्मी भइरहेको र कुनै पनि कक्षामा फाइनको व्यवस्था नभएका कारण विद्यार्थीलाई चौतारामा राखेर पठनपाठन गरेको विद्यालयका प्रधानाध्यापक गोकर्ण थापाले जानकारी दिनुभयो ।
विद्यालयको कक्षाकोठा सानो र विद्यार्थी संख्या धेरै भएकाले अत्यधिक गर्मीका कारण कक्षा ५ का विद्यार्थीलाई चौतारामा राखेर अध्ययन गराइरहेको उहाँले जानकारी दिनुभयो । विद्यालयको आर्थिक अवस्था निकै कमजोर भएका कारण विद्यालयले निजी शिक्षक राखेर अध्ययन अध्यापन गराउन समस्या भएको उहाँको भनाइ छ । विद्यालयमा आवश्यक शिक्षक नभएका कारण बाल कक्षामा अध्यापन गराउने शिक्षकले माथिल्लो कक्षामा अध्यापन गराइरहेको उहाँले बताउनु भयो ।
विद्यालयलाई गाउँपालिकाले चालु आर्थिक वर्ष २०८०÷८१ मा कुनै पनि किसिमको सहयोग नगरेको उहाँले जानकारी दिनुभयो । प्रधानाध्यापक थापाले भन्नुभयो– ‘कक्षा कोठा सानो भएको र विद्यार्थी संख्या धेरै रहेकाले पठनपाठन कठिन भइरहेको छ ।’ २० जना विद्यार्थी पठनपाठन गर्न सक्ने क्षमता भएको कक्षाकोठामा ३५–४० जना विद्यार्थी पढाउने गरेको उहाँको भनाइ छ ।
विद्यालयमा मगर, माझीसहित जनजाति समुदायको विद्यार्थीको बाहुल्यता रहेको छ । विद्यालयले आगामी वर्षबाट कक्षा ९ को पठनपाठन सञ्चालन गर्ने लक्ष्य राखेको छ । विद्यार्थीलाई माध्यमिक तहमा अध्ययनका लागि टाढासम्म पुग्नुपर्ने समस्या भएको र विद्यार्थीले बीचमा नै पढाइ छोड्नुपर्ने बाध्यता नहोस् भनेर अर्को वर्ष ९ र त्यसपछि १० कक्षासम्म सञ्चालन गर्ने लक्ष्य लिएको प्रधानाध्यापक थापाले जानकारी दिनुभयो ।
विद्यालयमा विद्यालय भवन, शिक्षक दरबन्दी, फाइन, घेराबार आदिको समस्या रहेको छ । ८ कक्षासम्म पठनपाठन हुने विद्यालयमा हाल २ सय ८५ जना विद्यार्थी रहेका छन् । विद्यालयले विद्यार्थीहरुलाई दिवा खाजा उपलब्ध गराउँदै आएको छ ।
