हेटौंडाः आन्तरिक राजस्व कार्यालय मकवानपुरले चालु आर्थिक वर्ष २०८०/०८१ को चैत मसान्तसम्म लक्ष्यको ७२ प्रतिशत राजस्व संकलन गरेको छ । चालु आर्थिक वर्षको ९ महिनामा कार्यालयले ६ अर्ब २९ करोड ५५ लाख ५ हजार ७ सय ६० रुपैयाँ राजस्व संकलन गर्ने लक्ष्य राखेकोमा ४ अर्ब ५५ करोड ३४ लाख २९ हजार ८ सय २० रुपैयाँ राजश्व संकलन गरेको हो ।
कार्यालयले बक्यौतातर्फ १४ करोड १९ लाख ४४ हजार ३ सय रुपैयाँ संकलन गर्ने लक्ष्य राखेकोमा १२ करोड २८ लाख १७ हजार ६ सय २० रुपैयाँ संकलन गरेको छ । कार्यालयले लक्ष्यको ७९ प्रतिशत बक्यौता रकम संकलन गरेको हो ।
उक्त समयमा कार्यालयले ९० वटा पसलको अनुगमन गर्ने लक्ष्य राखेकोमा १८६ वटा पसलको अनुगमन गरेको छ । कार्यालयले बजार अनुगमनबाट ७७ हजार ४ सय रुपैयाँ जरिवाना गर्ने लक्ष्य राखेकोमा २ लाख ९९ हजार रकम जरिवाना असुल गरेको छ । यस्तै, कार्यालयले अनुगमन र समन्वयबाट ४१ वटा नयाँ फर्म दर्ता, १ हजार ९ सय ३४ नयाँ व्यावसायिक लेखा नम्बर दर्ता, १७ वटा कानुनी कारबाहीबाट मूल्य अभिवृद्धि करमा दर्ता, १ हजार ४ सय ४७ अन्तःशुल्क नवीकरण, २४ वटा मूल्य अभिवृद्धि कर दर्ता परीक्षण, द्रुत कर परीक्षणबाट ५ लाख २२ हजार ५० रुपैयाँ राजस्व संकलन र ९ वटा झुटा तथा नक्कली बिजक प्रयोग गर्ने व्यवसायीको अनुसन्धान गरेको छ ।
जिल्लामा १ लाख १५ हजार १ सय ६९ जना करदाता रहेका छन् । जिल्लामा कुल ४ लाख ६६ हजार ७३ जना जनसंख्या रहेकोमा २५ प्रतिशत करदाता भएको आन्तरिक राजस्व कार्यालय हेटौंडाले जनाएको छ । आयकरमा ३२ हजार ७ सय ८८ जना, मूल्य अभिवृद्धि कर (भ्याट)मा ५ हजार ६ सय ८१ जना, अन्तःशुल्कमा १ हजार ६ सय १५ जना, व्यावसायिक प्यानमा ६ सय ७३ जना र व्यक्तिगत प्यानमा ७४ हजार ४ सय ९ जना करको दायरामा समावेश भएका छन् । जिल्लाको कुल जनसंख्याको २५ प्रतिशत मानिस करको दायरामा आएको कार्यालयले जनाएको छ । व्यक्तिगत प्यान व्यक्तिले जुनै स्थानबाट पनि प्राप्त गर्न सक्ने हुनाले जिल्ला भित्रका मानिसले अन्यत्रबाट पनि प्यान लिएको हुनसक्ने कार्यालयले अनुमान गरेको छ ।
यस्तै, आर्थिक वर्ष २०७९/०८० मा १६ हजार ९ सय ७९ वटा उद्योग व्यवसायीले आय कर बुझाउन बाँकी रहेको कार्यालयले जनाएको छ । आर्थिक वर्षको साउन, भदौ र असोज महिनामा व्यवसायीहरुले आयकर बुझाउनुपर्ने व्यवस्था रहेको छ, तर व्यवसायीले आवश्यकता अनुसार ३ महिनासम्म आयकर बुझाउने म्याद थप्न सक्ने कार्यालयका प्रमुख तुलसीप्रसाद भट्टराईले जानकारी दिनुभयो । भट्टराईका अनुसार मकवानपुरमा धेरै करदाताले आयकर बुझाउन बाँकी रहेको बताउनुभयो ।
मानिसमा सरकारलाई आयकर बुझाउनु पर्छ भन्ने अज्ञानताले पनि राजस्व कार्यालयमा धेरै व्यवसायीहरु कर बुझाउन नआएको उहाँको भनाइ छ । हालसम्म ३ हजार २ सयभन्दा बढी उपभोक्ता समिति कर बुझाउन आएका छैनन् । उपभोक्ता समिति, गाउँका आमा समूह, कृषि समूहहरु गैरनाफामुखी संस्था नभएकाले आयकर बुझाउन नपर्ने भए पनि आय विवरण पेश गर्न आवश्यक रहेको भट्टराईले बताउनुभयो ।
यस्तै, राजस्व कार्यालयले मदिरा, सुर्ती तथा अन्य अन्तःशुल्कजन्य वस्तुको कारोबार गर्न अनुमति लिनुपर्ने जनाएको छ । तर धेरै व्यवसायीले अनुमति लिएको देखिएको छैन । कुनै व्यक्तिले आफ्नो कुल परम्परा एवम् संस्कृतिका लागि निजी उपयोग गर्न एक पटकमा पाँच लिटरसम्म रक्सी र दश लिटरसम्म जाँड बनाउन इजाजतपत्र लिन नपर्ने भए पनि रक्सी र जाँड वर्षको ६ पटकभन्दा बढी बनाउन नपाउने कानुनी व्यवस्था रहेको छ । रक्सी र जाँड बनाउने व्यक्तिले कर अधिकृतलाई सूचना दिनुपर्ने व्यवस्था रहेको छ ।
कार्यालय प्रमुख भट्टराईका अनुसार प्रत्येक व्यक्तिले सामान खरिद गर्दा बिल लिनुपर्ने र नलिएको अवस्थामा कर अधिकृतले जरिवाना गर्नसक्ने अधिकार भएकोसमेत जानकारी दिनुभयो । सोहीअन्तर्गत् सामान खरिदकर्ताले सामान किन्दा बिल लिन उहाँले आग्रहसमेत गर्नुभयो । कार्यालयले नक्कली बिजक प्रयोग गरेका ९ वटा करदातालाई कारबाही गरी ६ करोड राजस्व निर्धारण गरेको उहाँको भनाइ छ । उहाँले भन्नुभयो, ‘हामीले विगतका दिनमा नक्कली बिजक प्रयोग गरी राज्यको राजस्व छली गरेका ९ जना कारदातालाई अनुसन्धान गरी ६ करोड राजस्व निर्धारण गरेका छौँ । २ जना करदाताले ७ लाख ३७ हजार ८ सय ९८ रुपैयाँ राजस्व संकलनसमेत गर्यौं। अन्य ७ जना करदाता हामीसँग आउनुभएको छैन, अदालती प्रक्रियामा जानुभएको छ, अदालतले जे फैसला गर्छ हामी त्यही गर्छौं ।’
