हेटौंडाः अपहरण, शरीर बन्धक तथा जबरजस्ती करणी कसुर मुद्दामा पुर्पक्षका लागि कारागार थुनामा रहेका व्यक्तिहरू छुटाई दिन्छु भनी रकम लिने एक व्यक्तिलाई प्रहरीले पक्राउ गरेको छ । पक्राउ पर्नेमा बाराको कलैया उपमहानगरपालिका–२३, बैराठपुर बस्ने २५ वर्षीय सहदेव पटेल रहेको जिल्ला प्रहरी कार्यालय बाराले जानकारी दिएको छ ।
पटेलले अपहरण, शरीर बन्धक तथा जबरजस्ती करणी कसुर मुद्दाको पुर्पक्षका लागि कारागार कार्यालय पर्सा बीरगञ्जमा रहेका व्यक्तिलाई छुटाइदिन्छु भनी दश लाख र जबरजस्ती करणी कसुर मुद्दाको पुर्पक्षमा रहेका व्यक्ति छुटाइदिन्छु भनी ७ लाख लिएर ठगी गरेको आरोप छ । पुर्पक्षमा रहेका व्यक्तिहरुका आफन्तले दिएको जाहेरीको आधारमा पटेललाई प्रहरीले पक्राउ गरेको हो । पक्राउ परेका पटेललाई ठगी मुद्दा दर्ता गरी जिल्ला अदालत बाराबाट म्याद थप गरी अनुसन्धान कार्य भइरहेको प्रहरीले जनाएको छ ।
