हेटौंडाः राप्ती डिभिजन वन कार्यालय मनहरीअन्तर्गत् पवलीभञ्ज्याङ सामुदायिक वनमा डढेलो लगाउने एक जनालाई प्रहरीले पक्राउ गरेको छ । पक्राउ पर्नेमा मकवानपुरको इन्द्रसरोवर गाउँपालिका–२, सुकौरा बस्ने ३८ वर्षीय सोमबहादुर घिसिङलाई इलाका प्रहरी कार्यालय भीमफेदीको गस्ती टोलीले पक्राउ गरेको हो ।
गत बुधबार घिसिङलाई पक्राउ गरिएको राप्ती डिभिजन वन कार्यालय मनहरीका योजना अनुगमन प्रमुख गगन शर्माले जानकारी दिनुभयो । घिसिङलाई पक्राउ गरी डिभिजन वन कार्यालय राप्तीले जिल्ला अदालत मकवानपुरबाट म्याद थप गरी अनुसन्धान कार्य गरिरहेको जनाएको छ । घिसिङलाई अहिले अनुसन्धानका लागि सशस्त्र वन रक्षक सुरक्षा कार्यालयमा राखिएको छ । वन ऐन २०७६ अनुसार वनमा आगो लगाउनेलाई क्षतिको बिगो असुल गरी ६० हजार जरिवाना वा ३ वर्ष कैद सजाय वा सबै खालका कारबाही हुनसक्ने कानुनी व्यवस्था रहेको छ ।
बुधबार इन्द्रसरोवर–२, सुकौरास्थित पवली भञ्ज्याङ सामुदायिक वनमा आगो लगाएको आरोपमा घिसिङलाई नियन्त्रणमा लिएको हो । घिसिङले लगाएको आगोबाट सोही स्थानका रामबहादुर घिसिङको माटो ढुङ्गा, टिनले छाएको २ तले घरको अगाडिको भाग काठको बार्दली, झ्याल, ढोका, अन्नपात मकै ५ मुरी, तोरी ३ मुरी, फापर १ मुरी, डीएपी मल २ बोरा, पानी राख्ने ड्रम ३ वटा र भाँडाकुँडाहरु जलेर क्षति भएको थियो ।
