हेटौंडाः हेटौंडा–१० स्थित नारायणी कलेजले कक्षा–१२ का विद्यार्थीहरुका लागि बिदाई तथा फेरि भेटौंला कार्यक्रम आयोजना गरेको छ । आइतबार हेटौंडा–४ स्थित रोयल पार्टी प्यालेसमा कक्षा ११ अध्यनरत विद्यार्थीहरुले १२ कक्षाको अध्ययन पूरा गरेका विद्यार्थीहरुका लागि बिदाईसहित फेरि भेटौंला कार्यक्रमको आयोजना गरेको हो ।
नारायणी कलेजका प्रिन्सिपल रघुनाथ खरालको सभाध्यक्षमा बिदाई कार्यक्रम भएको हो । कार्यक्रमलाई सम्बोधन गर्नुहुँदै प्रिन्सिपल खरालले कक्षा १२ को वार्षिक परीक्षमा सहभागी हुने सम्पूर्ण विद्यार्थीलाई शुभकामना व्यक्त गर्नुभएको छ । कलेजमा अध्यनरत विद्यार्थीहरुको बिदाई भन्दा पनि शुभकामनाका सन्देश प्रदान गर्नका लागि कार्यक्रम आयोजना गरेको उहाँले बताउनुभएको हो ।
कमजोर नतिजाका कारण स्नातक तहको अध्ययनमा नकारात्मक प्रभाव पर्ने भएकाले परीक्षा राम्ररी दिन उहाँले आग्रह गर्नुभयो । बिदाई कार्यक्रममा कक्षा–१२ का विद्यार्थीहरुलाई प्रिन्सिपल खरालले खादा र टीका लगाएर बिदाई गर्नुभएको थियो ।
कार्यक्रममा कक्षा–११ मा अध्यनरत विद्यार्थी सुविन लामालाई सम्मान गरिएको छ । केन्द्रीयस्तरको राष्ट्रपति रनिङ शिल्ड प्रतियोगितामा सहभागी भएका लामाले रिले दौडतर्फ स्वर्ण पदक प्राप्त गर्न सफल भएकोले सम्मान गरिएको हो ।
विद्यालयको खेलकुद सप्ताहमा सञ्चालन भएको भलिबल, फुटबल ब्याडमिन्टन, एथ्लेटिक्स, हाजिरीजवाफ प्रतियोगितामा प्रथम र द्वितीय हुने खेलाडीहरुलाई शिल्ड, मेडल तथा प्रमाणपत्र प्रदान गरिएको छ । फुटबलतर्फको खेलमा उत्कृष्ट खेलाडी घेषित हुने राशा महर्जनलाई ट्रफी प्रदान गरिएको छ । एथ्लेटिक्समा प्रथम हुने रोहित पण्डित र द्वितीय हुन सफल भएका विक्रम ठाकुरलाई मेडल तथा प्रमाणपत्र प्रदान गरिएको थियो ।
बिदाई कार्यक्रममा ११ कक्षाका विद्यार्थीहरुले नृत्यसँगै सांगीतिक प्रस्तुति पनि गरेका थिए । कार्यक्रममा ११ र १२ कक्षाका करिब ३ सय ५० विद्यार्थीहरुको सहभागिता रहेको थियो ।
