हेटौंडाः बागमती प्रदेश खेलकुद विकास परिषद्को आयोजनामा प्रथम अन्तर प्रदेशस्तरीय राष्ट्रिय खेलकुद प्रतियोगिता सुरु भएको छ । आइतबार चितवन जिल्लाको गौतमबुद्ध अन्तर्राष्ट्रिय क्रिकेट रंगशालामा सुरु भएको प्रतियोगिताको उद्घाटन प्रधानमन्त्री पुष्पकमल दहाल प्रचण्डले गर्नुभएको हो ।
कार्यक्रमको उद्घाटन गर्नुहुँदै प्रधानमन्त्री प्रचण्डले संघीय लोकतान्त्रिक संविधान जारी भएर संघीय प्रणालीको अभ्यास भएपश्चात् पहिलो पटक प्रतियोगिताको आयोजना गरेकोमा शुभकामना व्यक्त गर्नुभयो । नेपाली खेलकुदको क्षेत्रमा पहिलो अन्तरप्रदेश खेलकुद भएको कुरालाई मध्य नजर गर्दै प्रतियोगिताले देशको सातवटै प्रदेशका परिषद् र विधागत संघहरुलाई यस्तो प्रकारका प्रतियोगिताको आयोजना गर्न थप प्रेरणा मिल्ने उहाँले बताउनुभयो । प्रतियोगिताबाट विभिन्न प्रदेशका खेलाडीहरुले छुट्टाछुट्टै शिक्षा लिन सक्ने बताउनुभयो ।
संघीयता कार्यान्वयन भएसँगै प्रदेश खेलकुद विकास परिषद्ले दुई वटा संस्करणको प्रदेशस्तरीय प्रतियोगिताको आयोजना गरेर अग्र स्थानमा पर्न सफल भएको प्रधानमन्त्री प्रचण्डले बताउनुभयो । अन्तर प्रदेशस्तरीय प्रतियोगिताको माध्यमले प्रतिभाशाली खेलाडीको उत्पादन हुने र अन्तर्राष्ट्रियस्तरको प्रतियोगितामा समेत सहभागी हुन पाउने भएकोमा उहाँले खुशी व्यक्त गर्नुभयो । खेल क्षेत्रमा पछिल्लो समयमा नेपालले प्रगति गरेर निक्कै फड्को मारिहरेको बताउनुहुँदै नेपालको अर्थतन्त्र, कूटनीति, अन्तर्राष्ट्रिय सम्बन्धको विकास सन्दर्भमा समेत नेपालले प्रगति गरेको उहाँको भनाइ छ । खेलकुद क्षेत्रको वर्तमान अवस्थालाई मूल्यांकन गर्दा नेपालको खेलकुद जगतले नयाँनयाँ सफलता हासिल गर्ने उहाँले दावी गर्नुभएको छ ।
स्थानीयस्तरबाट प्रतियोगिताको आयोजना गरेमा खेलाडीहरुले बाल्यकालदेखि नै केन्द्रीय स्तरदेखि राष्ट्रिय तथा अन्तर्राष्ट्रिय स्तरको प्रतियोगितामा सहभागी हुने पाउने उहाँले धारणा राख्नुभएको छ । प्रतियोगितामार्फत् खेलाडीहरुको खेलप्रतिको माया बढ्दै जाने उहाँले बताउनुभयो । स्थानीय तहबाट नै खेलाडीहरुको खोजी गर्नका लागि अन्तर प्रदेशस्तरीय प्रतियोगिताले ठूलो सहयोग गरिरहेको उहाँको भनाइ छ । प्रदेशस्तरीय प्रतियोगिताले विभिन्न जिल्लाहरुमा खेलकुदमय वातावरण सँगसँगै प्रतिस्पर्धाको मनोविज्ञानमा थप टेवा पुग्ने उहाँले बताउनुभयो । भरतपुर भ्रमण वर्षको शुभारम्भ भएकोमा प्रतियोगिताले भौतिक प्रवद्र्धनमा समेत महत्वपूर्ण योगदान पु¥याउने उहाँको विश्वास छ ।
प्रतियोगिताले पर्यटन, होटल व्यावसायीको अर्थतन्त्रमा समेत ठूलो टेवा पुग्ने आंकलन प्रधानमन्त्री प्रचण्डले गर्नुभयो । प्रतियोगितामा सहभागी हुने खेलाडीहरुका लागि राज्यको तर्फबाट गर्न सक्ने सहयोग गर्ने बताउनुभएको छ । खेल क्षेत्रलाई उच्च प्राथमिकतामा समावेश गराएर व्यवस्थापन गरिने उहाँले बताउनुभयो । प्रतियोगितामा सहभागी भएका खेलाडीहरुलाई अनुशासनको पालना गर्न आग्रह गर्नुभयो । चितवन जिल्लाको गौतमबुद्ध क्रिकेट रंगशालालाई राष्ट्रियस्तरमा चिनाउनका लागि पनि प्रतियोगिता उद्घाटन कार्यक्रम रंगशालमा सञ्चालन गरेकोमा धन्यवाद व्यक्त गर्नुभयो ।
बागमती प्रदेश खेलकुद विकास परिषद्की अध्यक्ष एवम् प्रदेशको सामाजिक विकासमन्त्री कुमारी मोक्तानले प्रत्येक प्रदेशले २ वर्षको अन्तरालमा प्रतियोगिता आयोजना गर्ने सहमतिबमोजिम पहिलो प्रतियोगिता बागमती प्रदेशले आयोजन गर्ने अवसर पाएकोमा खुशी व्यक्त गर्नुभयो । प्रतियोगिताले संघीयता कार्यान्वयनमा ठूलो सहयोग पुग्ने तथा प्रदेशहरु नयाँ कार्यक्रमको आयोजना गर्न सक्षम बनाउन सकारात्मक सन्देश दिएको महसुस गरेको मन्त्री मोक्तानले बताउनुभयो । प्रतियोगिताले नेपाली खेलकुदको क्षेत्रमा टेवा पुगेको बताउनुभयो । विभिन्न ७ प्रदेशका खेलाडीहरुबीच प्रतिस्पर्धा गराउन, विभिन्न प्रदेशका खेलाडीहरुको पहिचान गर्न, खेलाडीहरुको खेल कौशलता अभिवृद्धि गर्न र प्रदेशका खेलाडीहरुबीच भातृत्व कायम गराउन प्रतियोगिताको आयोजना गरेको अध्यक्ष मोक्तानको भनाइ छ ।
प्रतियोगितामा ९ वटा खेलहरु सञ्चालन हुनेछन् । महिला र पुरुष भलिबल, फुटबल, क्रिकेट, कराँते, तेक्वान्दो, बक्सिङ, पौडी, व्याडमिन्टनलगायतका खेलहरु सञ्चालन हुनेछन् । शनिबारसम्म सञ्चालन हुने प्रतियोगिताको समाापन हेटौंडा–६ स्थित गौरीटार रंगशालमा हुनेछ । १ सय ३६ स्वर्ण पदकका लागि प्रतिस्पर्धा हुने प्रतियोगिता १ सय ३६ वटै रजत र १ सय ८६ वटा कास्य पदकको व्यवस्था गरिएको छ । प्रतियोगितामा ७ वटा प्रदेशबाट १ हजार ५ सयभन्दा बढी खेलाडीहरु सहभागी भएका थिए ।
प्रतियोगितामा स्वर्ण, रजत र कास्य पदक विजेताले क्रमशः ५ हजार रुपैयाँ, ४ हजार रुपैयाँ र ३ हजार रुपैयाँसहित प्रमाणपत्र प्राप्त गर्नेछन् । प्रतियोगिताको उपाधि विजेता टिमले ट्रफी, मेडल तथा प्रमाणपत्र प्राप्त गर्नेछन् । यस्तै, प्रतियोगिताको सर्वोकृष्ट खेलाडीले १० हजार रुपैयाँ र प्रमाणपत्र प्राप्त गर्नेछन् । प्रतियोगिताका लागि करिब १२ करोड रुपैयाँ खर्च हुने अनुमान गरिएको छ । प्रतियोगितामा सहभागी हुने खेलाडीहरुको खर्च प्रदेश खेलकुद विकास परिषद्ले व्यहोर्नेछ । यस्तै, खेलाडीहरुलाई ट्रयाकसुट, जुत्ता, मोजा र टावेल पनि प्रदान गरिनेछ ।
प्रतियोगिताको उद्घाटन कार्यक्रममा प्रदेश खेलकुद विकास परिषद्का सदस्यसचिव सूर्यलाल भण्डारी र ७ प्रदेशका मुख्यमन्त्रीहरुको उपस्थिति रहेको थियो ।
