हेटौंडाः बागमती प्रदेश खेलकुद विकास परिषद्को आयोजनामा आज आइतबारबाट अन्तरप्रदेशस्तरीय राष्ट्रिय खेलकुद प्रतियोगिता सुरु हुने भएको छ । चितवन जिल्लाको गौतमबुद्ध क्रिकेट रंगशालामा सुरु हुने प्रतियोगिताको उद्घाटन दिउँसो ४ बजे प्रधानमन्त्री पुष्पकमल दहाल प्रचण्डले गर्नुहुनेछ । प्रतियोगितामा ९ वटा विधामा १ सय ३६ वटा स्वर्ण पदकका लागि ७ प्रदेशका करिब १ हजार ५ सय ४७ जना खेलाडीहरुबीच प्रतिस्पर्धा हुनेछ ।
प्रतियोगितामा छनोट हुने खेलाडीहरुलाई प्रशिक्षण दिएर १० औँ संस्करणको राष्ट्रिय प्रतियोगितामा सहभागी गराउने प्रदेश खेलकुदले जनाएको छ । विभिन्न प्रदेशका खेलाडीहरु विभागीय टोलीमा गएपछि राष्ट्रिय खेलाडी उत्पादन गर्ने उद्देश्यले प्रतियोगिताको आयोजना गर्न लागेको प्रदेश खेलकुद विकास परिषद्का सदस्यसचिव सूर्यलाल भण्डारीले जानकारी दिनुभएको छ । प्रतियोगिताको माध्यमले सबै प्रदेशले समयमा खेलाडीहरु तयार गर्ने र खेलाडी उत्पादनमा थप टेवा पुग्ने उहाँले बताउनुभयो ।
आइतबारबाट शनिबारसम्म सञ्चालन हुने प्रतियोगिताको समापन हेटौंडा–६ स्थित गौरीटार रंगशालामा प्रदेशका मुख्यमन्त्री शालिकराम जम्कट्टेलले गर्नुहुने उहाँले बताउनुभयो । प्रतियोगिताका लागि १ सय ३६ वटा स्वर्ण, १ सय ३६ वटै रजत र १ सय ८६ वटा कास्य पदक गरी ४ सय ५८ वटा पदकको व्यवस्था गरिएको प्रदेश खेलकुद विकास परिषद्का सदस्यसचिव भण्डारीले जानकारी दिनुभएको छ ।
चितवन जिल्लाको गौतमबुद्ध क्रिकेट रंगशालालाई राष्ट्रियस्तरमा चिनाउनका लागि पनि प्रतियोगिताको उद्घाटन गर्न लागेको बताउनुहुँदै मकवानपुरमा फुटबल खेलप्रतिको आकर्षण बढ्दै गएकोले प्रतियोगिताको समापन हेटौंडामा गर्न लागेको उहाँले बताउनुभयो । पुरुष फुटबल प्रतियोगिताको समापनसँगै प्रतियोगिताको पनि समापन गरिने उहाँले बताउनुभयो । हेटौंडा–५ स्थित पिप्ले क्याम्पा रंगशालामा प्रतियोगिताको समापन गर्ने लक्ष्य लिएको प्रदेशले हिजो शनिबारबाट क्याम्पामा मेयर कप फुटबल प्रतियोगिता सुरु भएकाले प्रतियोगिताको समापन गौरीटारमा गरिने उहाँले बताउनुभयो ।
प्रतियोगितामा ७ प्रदेशका खेलाडीहरुबीच ९ वटा विधामा प्रतिस्पर्धा हुनेछ । प्रतियोगिताअन्र्तगत् पुरुष फुटबल हेटौंडाको गौरीटार रंगशालामा हुनेछ भने बाँकी ८ वटा खेलहरु भरतपुर महानगरपालिकामै हुनेछ । एथ्लेटिक्स सोमबार र मंगलबार चितवनको चित्रवन रंगशालामा र सोमबारदेखि बुधबारसम्म भलिबल भरतपुरको गेष्ट हाउस चौरमा हुनेछ ।
यस्तै, कराँते र तेक्वान्दो सोमबार र मंगलबार भरतपुर महानगरपालिकाको औद्योगिक प्रदर्शनी हलमा हुनेछ । पौडी प्रतियोगिता सोमबार र मंगलबार एल्टीडी हबेलीमा र व्याडमिन्टन सोमबारदेखि मंगलबारसम्म भरतपुर महानगरपालिकाको कभर्ड हलमा हुनेछ । महिला क्रिकेट शनिबारदेखि मंगलबारसम्म र पुरुष क्रिकेट बुधबारदेखि शनिबारसम्म गौतमबुद्ध क्रिकेट रंगशालामा हुनेछ । महिला फुटबल सोमबारदेखि शनिबारसम्म बखत स्मृति रंगशालामा र बक्सिङ औद्योगिक प्रदर्शनी कभर्ड हलमा सोमबारदेखि बिहीबारसम्म हुनेछ ।
प्रतियोगिता सम्पन्न गर्नका लागि प्रदेश खेलकुद विकास परिषद् अध्यक्ष एवम् बागमती प्रदेशको सामाजिक विकासमन्त्री कुमारी मोक्तानको अध्यक्षतामा मुल समारोह समिति गठन गरिएको छ भने सदस्यसचिव भण्डारीको अध्यक्षतामा कार्यकारी समिति गठन गरिएको छ । प्रतियोगिताका लागि विभिन्न ५ उपसमितिहरु र ९ वटा समिति गठन गरिएको छ ।
प्रदेश खलकुद परिषद्को १७ औँ बोर्ड बैठकले प्रदेश टिमको तयारीको विषयमा समीक्षा गरेको थियो । बैठकले अन्तरप्रदेशस्तरीय खेलकुद प्रतियोगिताको लागि विभिन्न उपसमितिको संयोजक तोकेको छ । प्रचारप्रसार समिति संयोजकमा नेपालको पहिलो रेस्लर तथा कराँतेका एकेएफ रेफ्री हिक्मत थपलिया रहेका छन् । स्वास्थ्य उपसमितिको संयोजकमा तेक्वान्दोका अन्तर्राष्ट्रिय खेलाडी अमृत तामाङ र पुरस्कार तथा खेल सामग्री व्यवस्थापन संयोजकमा अन्तर्राष्ट्रिय कराँते खेलाडी तथा चलचित्र निर्माता निरञ्जन थापालाई चयन गरेको छ ।
बैठकले खेलस्थल व्यवस्थापनको संयोजकमा प्रदेश खेलकुद विकास परिषद्का बोर्ड सदस्य तथा बुद्धिचाल खेलाडी माधव तिमल्सिनालाई चयन गरेको छ । यस्तै, अनुशासन समितिमा सुनिता गौतम, प्राविधिक खेलकुद समन्वय समिति संयोजकमा धनकुमार मैनाली चयन भएका छन् । बसोबास तथा यातायात समिति संयोजकमा बोर्ड सदस्य तथा राष्ट्रिय कराँते खेलाडी उत्तम गुरुङलाई तोकिएको छ ।
नवौँ संस्करणको राष्ट्रिय खेलकुद प्रतियोगितामा बागमती प्रदेशको टिममा परेका, अन्तर्राष्ट्रियस्तरको प्रतियोगितामा सहभागी जनाएका र विभागीय टिमबाट राजीनामा दिएका खेलाडीहरुको आजबाट सुरु हुने प्रदेशस्तरीय प्रतियोगितामा सहभागी रहनेछ । प्रदेशको मापदण्डअनुरुप छनोट भएका, पहिलो र दोस्रो प्रदेशस्तरीय प्रतियोगितामा पदक प्राप्त गरेका खेलाडीहरु प्रतियोगितामा सहभागी रहने जनाइएको छ ।
प्रतियोगितामा स्वर्ण, रजत र कास्य पदक विजेताले क्रमशः ५ हजार रुपैयाँ, ४ हजार रुपैयाँ र ३ हजार रुपैयाँसहित प्रमाणपत्र प्राप्त गर्नेछन् । प्रतियोगिताको उपाधि विजेता टिमले ट्रफी, मेडल तथा प्रमाणपत्र प्राप्त गर्नेछन् । यस्तै, प्रतियोगिताको सर्वोकृष्ट खेलाडीले १० हजार रुपैयाँ र प्रमाणपत्र प्राप्त गर्नेछन् । प्रतियोगिताका लागि करिब १२ करोड रुपैयाँ खर्च हुने अनुमान गरिएको छ । प्रतियोगितामा सहभागी हुने खेलाडीहरुको खर्च प्रदेश खेलकुद विकास परिषद्ले व्यहोर्नेछ । यस्तै, खेलाडीहरुलाई ट्रयाकसुट, जुत्ता, मोजा र टावेल पनि प्रदान गरिनेछ ।
