हेटौँडाः नेपाल स्काउटले दिएको मानार्थ पदमा हेटौँडा उपमहानगरपालिकाकी प्रमुख मीनाकुमारी लामाले सक्रिय भूमिका निर्वाह गरिरहनुभएको छ । नगरप्रमुखको अस्वभाविक सक्रियताले स्काउटको निर्वाचित नगर आयुक्तले सपथ ग्रहण गर्न पाएका छैनन् । यद्यपि नगरप्रमुखको अवरोधले निर्वाचित आयुक्तलाई सपथ लिने वैकल्पिक बाटो रहन्छ । तर, नगरप्रमुखले मानार्थ पदमा रहेर सक्रिय भूमिका निर्वाह गरिरहँदा नगरप्रमुखप्रति स्काउटका अधिकारीले आश्चर्यमा छन् । नगरप्रमुख लामाले सपथ नगराउनुभएपछि फागुन २१ गते नगरआयुक्त नियुक्तिको विषय नेपाल स्काउटले सार्वजनिक गरेको छ ।
युवा विद्यार्थीको व्यक्तित्व, नेतृत्व विकास तथा जिवनोपयोगी सीप सिकाईका लागि स्थापित स्काउटमा पालिका, प्रदेश र संघीय सरकारका प्रमुखहरुलाई मानार्थ संरक्षक र अध्यक्षको पद दिइएको छ । अभिभावककोरुपमा स्वीकार गरेर स्काउटले नगरप्रमुखलाई संरक्षक र उपप्रमुखलाई अध्यक्षको पद दिएको छ । मानार्थ संरक्षकको पदमा रहनुभएकी हेटौँडा उपमहानगरपालिकाकी प्रमुख मीनाकुमारी लामाले नेपाल स्काउटको हेटौँडा उपमहानगर आयुक्तलाई सपथ नै गराइरहनुभएको छैन ।
गत माघ २२ गते सम्पन्न हेटौँडा उपमहानगर समितिको निर्वाचनबाट निर्वाचित १२ सदस्यीय नगर परिषद्ले अनिल आचार्यलाई आयुक्त चयन गरेको थियो । हेटौँडा उपमहानगरको आयुक्त चयन भएका अनिललाई सपथ गराउन भनी स्काउटले फागुन ३ गते उपमहानगरपालिकामा निवदेन दर्ता गराइएका थियो । निर्वाचित आयुक्तलाई सपथ गराउनुको विपरित नगरप्रमुख लामाले निर्वाचन वैधानिक नभएको, प्रतिनिधि हुन नपाएको भनी एक समूहले निवेदन दिएको उल्लेख गर्नुहुँदै दुवै पक्षलाई राखेर वार्ता गराउने प्रयास भइरहेको बताउनुभएको छ ।
नेपाल स्काउटको बागमती प्रदेशका आयुक्त शिवकुमार त्वयनाले भने कुनै किसिमको विवाद नरहेको र निर्वाचित आयुक्तलाई सपथ नगराउनु आश्चर्यको विषय भएको बताउनुभयो । नेपाल स्काउटले नगरप्रमुखलाई संरक्षक र उपप्रमुखलाई अध्यक्षको रुपमा मानार्थ पद दिएको बताउनुहुँदै प्रदेश आयुक्त त्वयनाले भन्नुभयो, “नगरप्रमुख र उपप्रमुखलाई सपथ गराइदिन भनी पत्र दर्ता गराएको सात दिनभित्र सपथ नगराए पालिकाको आयुक्तलाई प्रदेश आयुक्तले सपथ गराउन सक्ने व्यवस्था छ ।”
यता नगरप्रमुख लामाले स्काउटको एउटा पक्षले आफूहरु सहभागी हुन नपाएको भन्दै निवेदन दिएपछि वार्तामा बोलाइएको जानकारी दिनु भएको छ । “स्काउटको निर्वाचनमा आफूहरु सहभागी हुन नपाएको भनी निवेदन दर्ता गराएपछि छलफलका लागि दुवै पक्षलाई बोलाएको छु”, नगरप्रमुख लामाले भन्नुभयो, “शिक्षा अधिकृतलाई जिम्मा दिएको छु । छिट्टै विवाद समाधान हुन्छ । सपथ गराउँछु ।” निर्वाचनबाट नगर परिषद् गठन भएपछि नगरपरिषद्को निर्णय लिएर सपथका लागि निवेदन लिएर नगरप्रमुखको कार्यकक्षमा पुग्दा अभद्र व्यवहार समेत व्यहोर्नु परेको नवनिर्वाचित नगर आयुक्त अनिल आचार्यले बताउनुभयो । “हिजोका दिनमा पनि स्काउटको पोशाकमा सजिएर स्काउटलाई बुझ्नुभएकी नगरप्रमुखले स्काउटको ड्रेस नै त्यागी दिन्छु भन्दै अभद्र व्यवहार गर्नुभयो । हामीलाई बोल्नै दिनुभएन । स्काउटको नियमावली मान्दिन भन्नुभयो । हामी निर्वाचित समितिलाई गैरकानुनी भनिदिनुभयो”, नवनिर्वाचित नगरआयुक्त आचार्यले भन्नुभयो ।
गत माघ २२ गते भएको निर्वाचनले अनिल आचार्यसँगै निशा गौतम, सुमित्रा लामा, विमल खत्री, डेमिज थापा मगर, शारदा मैनाली, शर्मिला ढकाल, लक्ष्मी थापा, जोन पहाडी, इश्वर लामिछाने, किशोर श्रेष्ठ र सफिरा मिजारलाई सदस्य निर्वाचित गरेको थियो । १२ सदस्यीय नगरपरिषद्ले सर्वसम्मत अनिललाई नगरआयुक्त चयन गरेको नेपाल स्काउटका राष्ट्रिय परिषद् सदस्य अशोक सारु मगरले जानकारी दिनुभयो । नेपाल स्काउटले हेटौँडा उपमहानगरका १३ वटा सामुदायिक विद्यालय, ५ वटा निजी विद्यालय र २ वटा संस्थागत शाखा स्थापना गरेको छ ।
