हेटौंडाः बामगती प्रदेशसभा बैठकबाट विशेष समिति गठन गर्ने प्रस्ताव पारित भएको छ । बिहीबार बसेको प्रदेशसभा बैठकमा चालु आर्थिक वर्ष २०८०/८१ को बजेट तथा कार्यक्रम व्यवस्थापन विशेष समिति गठन गरिएको हो ।
बागमती प्रदेशमा बजेटको विषयमा आएको विवाद समाधान गर्न विशेष समिति गठन गर्ने सर्वदलीय बैठकबाट सहमति भएपछि प्रदेशसभा बैठक बिहीबार दिउँसो साढे २ बजे बसेको थियो । विगतमा प्रदेश सरकार र प्रदेशसभामा प्रतिनिधित्व गर्ने दलहरुबीच भएको समझदारी र मुख्यमन्त्री र आर्थिक मामिला तथा योजनामन्त्रीले आर्थिक वर्ष २०८०÷८१ को बजेट तथा कार्यक्रमको सम्बन्धमा सभासमक्ष भएको प्रतिबद्धतालाई संविधान, ऐन, कानुनअनुसार कार्यान्वयन गराउने गरी बजेट तथा कार्यक्रम व्यवस्थापन विशेष समिति गठन भएको हो ।
प्रदेशसभा नियमावली पहिलो संशोधनसहितको नियम १५२ बमोजिम समिति गठन भएको छ । गठित समितिले २०८० फागुन २९ गते मंगलबार दिउँसो ३ बजे बस्ने प्रदेशसभा बैठकमा प्रतिवेदन पेस गर्नुपर्नेछ । समितिको कार्यविधि समिति आफैंले तोकेबमोजिम रहनेछ ।
प्रदेशसभामा माओवादी बामगती प्रदेशका प्रमुख सचेतक रत्नप्रसाद ढकालले समिति गठन गर्ने प्रस्ताव पेश गर्नुुभएको थियो । विशेष समितिमा ११ सदस्य रहेका छन् । विशेष समितिको संयोजकमा प्रदेशसभा सदस्य गोविन्द लम्साल रहनुभएको छ । समितिको सदस्यमा प्रदेशसभा सदस्यहरु इन्द्रप्रसाद गोतामे, उद्धव थापा, गिरबहादुर तामाङ, डा. दिनेशचन्द्र देवकोटा, प्रभात तामाङ, बसन्तप्रसाद मानन्धर, रत्नप्रसाद ढकाल, रमा आले मगर, मधुसुदन पौडेल र शैलेन्द्रमान बज्राचार्य रहनुभएको छ ।
यस्तै, प्रदेशसभामा उद्योग, वाणिज्य, भूमि तथा प्रशासनमन्त्री रामकृष्ण चित्रकारले प्रदेशसभा नियमावली २०७४ को नियम १०६ को उपनियम २ बमोजिम प्रदेश हस्तकला ग्राम स्थापना तथा सञ्चालनको सम्बन्धमा व्यवस्था गर्न बनेको विधेयक २०८० पेस गर्नुभएको छ । उक्त विधेयकमा विचार गरियोस् भन्ने प्रस्ताव पारित भएको छ । प्रदेशसभामा लेखा समितिमा रहेका प्रदेशसभा सदस्य ठाकुरप्रसाद ढकाललाई सभामुख भुवनकुमार पाठकले शिक्षा, स्वास्थ्य तथा कृषि समितिमा हेरफेर गर्नुभएको छ । प्रदेशसभाको अर्को बैठक फागुन २९ गते मंगलबार दिउँसो ३ बजे बस्ने सभामुख पाठकले जानकारी गराउनुभयो ।
