हेटौँडाः हेटौँडा–४ स्थित लिटिल बड्डी प्रि–स्कूलले अभिभावक दिवसको आयोजना गरेको छ । ५ वर्षअघि सञ्चालनमा आएको बेलायत फ्रेन्चाइज प्रि–स्कूलले पहिलो पटक अभिभावक दिवसको आयोजना गरेको हो । अभिभावक दिवसमा विद्यार्थीले गायन, नृत्य तथा नाट्यकला प्रस्तुत गरेका थिए ।
प्रि–स्कूल सञ्चालक योवराज दाहालको अध्यक्षता तथा हेटौँडा उपमहानगरपालिका ४ नम्बर वडा सदस्य जनरल श्रेष्ठको प्रमुख आतिथ्यमा अभिभावक दिवस समारोह भएको हो । अभिभावक दिवसलाई सम्बोधन गर्नुहुँदै प्रमुख अतिथि जनरल श्रेष्ठले हेटौँडामा लिटिल बड्डी सञ्चालनमा आएर बालबालिकाको सर्वाङ्गिण विकास चाहने अभिभावकका लागि सहज भएको बताउनुभयो । लिटिल बड्डी प्रि–स्कूलको आफू पनि अभिभावक भएको उल्लेख गर्नुहुँदै श्रेष्ठले ४ नम्बर वडा शैक्षिक केन्द्रको रुपमा विकसित हुँदै जाँदा वडा कार्यालयले पनि शिक्षालाई प्राथमिकता दिएर काम गरिरहेको जानकारी दिनुभयो ।
अभिभावक दिवसमा लिटिल बड्डी किन्डरगार्डेन भारतकी संस्थापक एवम् दक्षिण एसिया प्रमुख राज्या गंगाधरणको पनि उपस्थिति रहेको थियो । अभिभावक दिवसमा सहभागी हुन भारतबाट आउनुभएकी गंगाधरणले हेटौँडामा लिटिल बड्डी प्रि–स्कूलको सञ्चालन र अभिभावकको उपस्थिति प्रशंसनीय रहेको बताउनुभयो । बालबालिकाको उचित स्याहार र सर्वाङ्गिण विकासमा लिटिल बड्डीको कामलाई लिएर कुनै गुनासो भए निर्धक्क राख्न आग्रह गर्नुहुँदै अभिभावकको प्रतिक्रियाले अझै सुधार गर्न सहयोग पुग्ने उहाँको भनाइ थियो ।
लिटिल बड्डी प्रि–स्कूल हेटौँडाका सञ्चालक योवराज दाहालले पाँच वर्षअघि ४ जना शिक्षक र १५ जना विद्यार्थीबाट सुरु भएको प्रि–स्कूलमा अहिले ४० जना शिक्षक र एक सय ८८ जना विद्यार्थी रहेको जानकारी दिनुभयो । बेलायती फ्रेन्चाइज लिटिल बड्डी प्रि–स्कूल दक्षिण एसियामा नेपाल, भारत, श्रीलंका, बंगलादेशसहित १० देशमा ९१ वटा स्कूल सञ्चालित छन् । नेपालमा हेटौँडासँगै गतवर्षदेखि बीरगन्जमा पनि सञ्चालनमा लिटिल बड्डी प्रि–स्कूल सञ्चालनमा रहेको छ । कार्यक्रममा सहभागी अभिभावकले प्रि–स्कूलले आफ्ना नानीबाबुलाई राम्रो संस्कार, शिक्षा र जिवनोपयोगी व्यवहार सिकाई रहेको भन्दै खुसी व्यक्त गरेका थिए ।
