बकैयाः बागमती प्रदेशका उद्योग, वाणिज्य, भूमि तथा प्रशासनमन्त्री रामकृष्ण चित्रकारले बकैयामा निर्माणाधीन औद्योगिक ग्रामको अवलोकन गर्नुभएको छ । बिहीबार मन्त्री चित्रकारले बकैया–७ मा निर्माणाधीन अवस्था रहेको कृषि उद्योगको अवलोकन गर्नुभएको हो ।
अवलोकनपश्चात् मन्त्री चित्रकारले औद्योगिक ग्रामले कृषि प्रवद्र्धन गर्न सहयोग पुग्ने धारणा राख्नुभयो । थोरै स्थानीय तहले मात्रै उद्योग सञ्चालनमा जोड दिएकोले आफूले पनि सकेको सहयोग गर्ने बताउनुभयो । उहाँले आगामी आर्थिक वर्षमा उद्योग ग्राम निर्माणको लागि बजेट विनियोजन गर्ने आश्वासन दिनुभयो । उहाँले प्राकृतिक स्रोत साधन उपयोग गर्न सबै डराएको बताउनुभएको छ । उहाँले कानुन बलियो नहुँदा कार्मचारी र प्रतिनिधिले प्राकृतिक स्रोतसाधन उपयोग गर्न डराएको बताउनुभयो ।
देश संघीयतामा गएता पनि ऐन कानुन निर्माण हुन नसक्दा काम गर्न असहज भएको उहाँले धारणा राख्नुभयो । अन्य विकसित देशहरु प्राकृतिक स्रोत साधनको परिचालन गरेर विकास भएको बताउँदै प्राकृतिक स्रोत उपभोगका लागि आवश्यक रहेकोमा जोड दिनुभयो । संघीय, प्रदेश र स्थानीय सरकारले पछिल्लो सयम पूर्वाधार विकासलाई मात्रै विकास मान्ने मनोभावले गर्दा देशमा विकासले गति लिन नसकेको बताउँदै उहाँले भन्नुभयो, ‘विकासको जग बलियो बनाउन नागरिक सक्षम हुन जरुरी छ । जनतालाई रोजगारी सिर्जना गर्न सके विकास सुनिश्चित छ । दिगो विकास हुन उद्यमशीलता आवश्यक छ, जसले युवालाई पलायन हुनबाट रोक्छ । सरकारले उद्योगमा लगानी गर्न आवश्यक छ ।’
मन्त्री चित्रकारले प्रहदेश सरकार स्थानीय सरकारसँग सहकार्य गर्न तयार रहेकोसमेत बताउनुभयो । प्रदेश सरकारसँग स्रोत साधन पर्याप्त नभएको बताउँदै सबै मन्त्रालयभन्दा आफ्नो मन्त्रालय कमजोर भएकाले आगामी आर्थिक वर्षमा उच्च स्थानमा रहेर काम गर्ने उद्देश्यले आफू लागिपरेको उहाँको भनाइ छ । आफूले भूमिबैंक नीति निर्माणमा लगेको र अन्तिम चरणमा रहेको बताउनुभयो । आफू मन्त्री भएपश्चात् हेटौंडा कपडा उद्योगमा चासो देखाई केन्द्रमा लविङ गरेकोसमेत उहाँले जानकारी दिनुभयो । उद्योग सञ्चालन केन्द्रीय सरकार मातहत भएकाले सबै सरकारसँग सहकार्य गर्न आवश्यक रहेको बताउनुभयो ।
कार्यक्रममा गाउँपालिकाका अध्यक्ष धर्मराज लामिछानेले गाउँपालिका मल कारखाना, दाना उद्योग, साइलेज उद्योग निर्माणको चरणमा रहेको बताउनुभयो । पालिकाले कृषिलाई प्रबद्र्धन गर्न, कृषकलाई प्रोत्साहन गर्न र रोजगारी सिर्जनाबाट युवालाई वैदेशिक पलायन हुनबाट रोक्न उद्योग ग्राम निर्माणमा जोड दिएको उहाँको भनाइ छ । स्थानीय सरकारले किसानलाई प्रोत्साहनस्वरुप १४ लाख रुपैयाँ बराबरको बहुवर्षीय घाँसको विरुवा उपलब्ध गराएको बताउनुभयो ।
स्थानीय सरकारले गरिब, एकल महिलालाई लक्षित गरी तालिम प्रदान गरेर एक सय मौरीको घार वितरण गर्न लागेको बताउनुभयो । बाख्रा पकेट क्षेत्रमा लागत साझेदारीमा आधुनिक बाख्रा फार्म सञ्चालनका लागि वडा नम्बर १, २, ६ र ८ मा सहयोग गरेको अध्यक्ष लामिछानेले जानकारी दिनुभयो । कृषकहरुलाई मागको आधारमा साना सिंचाई कार्यक्रम सञ्चालन तथा कृषियन्त्र वितरण गरेको बताउनुभयो । उहाँले कृषकलाई फलफूल पकेट क्षेत्रमा फलफूूलको विरुवा वितरण र घाँसखेती प्रवद्र्धनका लागि अनुदान वितरण गरेको जानकारी गराउनुभयो ।
गाउँपालिका अध्यक्ष लामिछानेले जनशक्तिको अभाव र बजेटमा आन्तरिक स्रोतको हिस्सा बढाउन चुनौतीपूर्ण रहेको जानकारी दिनुभयो । नदीजन्य पदार्थको स्टक हालसम्म जिल्ला समन्वय समितिले प्रमाणित नगर्दा राजश्वमा प्रत्यक्ष असर परेको उहाँको भनाइ छ । भौगोलिक विकटता र छरिएको बस्तीका कारण भौतिक पूर्वाधारको विकासमा समस्या भई सेवा प्रवाह प्रभावकारी हुन नसकेको बताउनुभयो । नागरिक चेतनाको कमीले विकासको बुझाईमा एकरुपता कायम गर्न र सिमित स्रोत साधनका बिच नागरिकको बढ्दो महत्वकांक्षा पूरा गर्न पालिकालाई चुनौती भएको उहाँले बताउनुभयो ।
अध्यक्ष लामिछानेले प्रदेश सरकारले कृषिजन्य उद्योग तथा उद्यमशीलता विकासका लागि आवश्यक स्रोतको व्यवस्था गर्नुपर्ने माग गर्नुभयो । स्थानीय तहको मुख्य राजस्वको स्रोतको रुपमा रहेको नदीजन्य पदार्थसम्बन्धी कानुनी स्पष्टता तथा मार्गदर्शनका लागि आवश्यक समन्वय तथा पहल गरिदिनुपर्नेमा जोड दिनुभयो ।
गाउँपालिकाका उपाध्यक्ष भक्तबहादुर खत्रीले सरकारले स्रोत साधनको विकास गर्न आवश्यक रहेको बताउँदै भौतिकमात्र नभई जनताको आवश्यकताको आधारमा विकास गर्नुपर्नेमा जोड दिनुभयो । गरिबी न्यूनीकरणका लागि पालिका लागिपर्नेमा उहाँले जोड दिनुभयो । ३२ सालमा नापी भएको जग्गाको लालपुर्जा मानिसले नपाएकाले जनताले भू–स्वमित्व नपाएको बताउनुभयो ।
