हेटौंडाः वित्तीय क्षेत्रविरुद्ध अभियान चलाउँदै आएका दुर्गा प्रसाईले सडकमा सुत्न बाध्य भएका जनतालाई उठाउन आफूले अभियान चलाएको बताउनुभएको छ । शनिबार हेटौंडा–४ स्थित हुप्रचौरमा भएको सभालाई सम्बोधन गर्नुहुँदै अभियन्ता एव्म राष्ट्र, राष्ट्रियता, धर्म, संस्कृति र नागरिक बचाउ अभियान समूहका केन्द्रीय संयोजकसमेत रहनुभएका प्रसाईले यस्तो बताउनुभएको हो ।
अहिले सर्वहारा र भुँई मान्छेहरुको गाँस, बास र कपास खोस्ने काम भइरहेको उहाँले बताउनुभयो । उहाँले वित्तीय संस्थाहरुले सुरुमा ७ प्रतिशत व्याजमा ऋण दिई हस्ताक्षर गराएर १८ प्रतिशतसम्म व्याज लिएर जनतालाई घरबारविहीन बनाएर सडकमा पुर्याएको बताउनुभयो । अहिले सरकार र बैंकले युवालाई खाडी पठाइरहेको र पीडित महिलाहरुलाई जङ्गलमा लुक्न बाध्य बनाएको उहाँले आरोप लगाउनुभयो । परदेशमा गएर कमाएको पैसा बैंकको ऋण तिर्नसमेत नसकिरहेको र देशमा हुनेलाई पनि केही गर्न नदिएको उहाँले बताउनुभयो ।
आफूले चलाएको अभियानले कसैलाई सुकुम्बासी बन्न नदिन्ने भन्दै उहाँले यो व्यवस्था परिवर्तन गर्न सबै लाग्नुपर्ने बताउनुभयो । त्यसपछि सबैको घरजग्गा फिर्ता हुने र धनीपुर्जा नयाँ बनाएर आफूले जिम्मा लगाउने अठोटका साथ आफू लागेको उहाँको भनाइ छ । आगामी फागुन १ गते काठमाडौंमा आन्दोलनको कार्यक्रम राखेको बताउनुहुँदै उहाँले सबैलाई सहभागी हुन आग्रह गर्नुभयो ।
उहाँले भन्नुभयो– ‘अब अन्तिम लडाइँ लड्नुछ, सबैजना सहभागि हुनुहोला । नभए कसैको घर जग्गा जोगिनेवाला छैन ।’ उहाँले पीडितहरुलाई बैंकबाट जोगाउन आफू सबै चिज छोडेर लागेकाले सबैले आफूलाई साथ दिनुपर्ने बताउनुभयो । उहाँले अब पीडितहरु घर छाडेर जान नपर्ने र आनन्दले सुत्न पाउने दिन आउन लागेको बताउनुभयो ।
आफूले बैंक पीडितको आवाजलाई उठाउँदै गर्दा विभिन्न आरोप लाग्ने गरेको भन्दै उहाँले आफूले कुनै सहकारी नठगेको बताउनुभयो । आफूले धितो राखेर मेडिकल कलेज चलाउन ऋण लिएको तर सरकारले चलाउन नदिएको आरोप लगाउनुभयो । विद्यार्थी पढाउन र कलेज चलाउन पाए आफूले ऋण तिर्ने उहाँले उद्घोष गर्नुभयो ।
उहाँले नेपालमा कुनै दलले राजा ल्याउन नसक्ने बताउनुभएको छ । अहिले राजावादी भनिएका राष्ट्रिय प्रजातन्त्र पार्टीलगायत कुनै दलले राजा ल्याउन नसक्ने उहाँले दाबी गर्नुभयो । सबैले राजावादीको नाम लिएर फाइदा उठाइरहेको बताउनुहुँदै उहाँले राप्रपाका नेताहरुलाई नाटक नगर्न आग्रह गर्नुभयो । राप्रपाले राजा र हिन्दूराज्य ल्याउँछ भन्ने कुराको भ्रममा नपर्न उहाँले आग्रह गर्नुभयो । राजा चाहिएमा आफ्नो पक्षको अभियानमा जोडिन उहाँले आग्रह गर्नुभयो । उहाँले राप्रपा अहिले सरकारमा बसेर राजा ल्याउन नसक्ने र राजा चाहिएमा सबै पदबाट राजीनामा दिनुपर्ने उहाँले बताउनुभयो ।
अभियान समूह नारायणी अञ्चल संयोजक विजय तिमल्सिनाको सभाध्यक्षतामा भएको कार्यक्रममा केन्द्रीय संंगठन विभागका प्रमुख हरि कार्कीलगायत जिल्ला समूहका अध्यक्षहरुको आतिथ्य रहेको थियो । सभामा मकवानपुर, चितवन, पर्सा, बारा र रौतहटका वित्तीय संस्थाबाट पीडित भनिएकाहरुको सहभागिता थियो ।
